बिक्रम सम्वत २०४० सालमा झापाको लखनपुरमा जन्मेकी निरुले कोरस नृत्यबाट कलाकारिताको सुरुवात गरेकी हुन् । उनले करिअरको सुरुवातमा सिनेमा ‘माइली’ मा समावेश भएको कति औँली अग्ली भएँ बोलको गीतमा नृत्य गरेकी थिइन् । त्यसपछि उनले कोरश डान्सर भएर लगातार २२ वटा जति सिनेमामा काम गरिन् । त्यसपछि भने उनले कलाकारितामा निरन्तरता दिन सकिनन् ।

पर्दामा २१ वर्षको उमेरमा नाच्न थालेकी निरुले त्यसको केही वर्षपछि टेलिश्रृङ्खला ‘थोरै भए पुगीसरी’मा अभिनेत्रीको रुपमा काम गर्ने मौका पाइन् । त्यसपछि उनले अर्को चर्चित टेलिश्रृङ्खला ‘तितो सत्य’मा पनि काम गरिन् । तर उनलाई चर्चित बनाउनमा भने टेलिसिरियल ‘मेरी बास्सै’को ठूलो भूमिका छ ।

‘मेरी बास्सै’मा गाउँले युवती निर्मलीको भूमिका निर्वाह गरेपछि उनलाई दर्शकले रुचाए । उनी यही एउटा भूमिकाबाट लोकप्रिय भइन् जसले अहिले पनि निरन्तरता पाएको छ । अहिले पनि उनी निर्मलीकै नामले परिचित छिन् ।

मंगलबार जन्मदिनमा गोकर्णमा एउटा विज्ञापनको छायाँकनमा रहेकी निरुले छायाँकनस्थलमा रमाइलो तरिकाले जन्मदिन मनाएकी छिन् । विज्ञापन निर्देशन गरिरहेका निर्देशक पवन केसीले मुला काटेर उनको जन्मदिनलाई रमाइलो बनाइदिएका हुन् । यो जन्मदिन अहिलेसम्मकै रमाइलो भएको निरुले बताइन् ।