काठमाडौं, ११ वैशाख । पूर्व राष्ट्रपति डाक्टर रामवरण यादवले चुरे क्षेत्रको संरक्षणमा गम्भीर हुन नसकेको भन्दै चिन्ता व्यक्त गर्र्नुभएको छ ।

बारबरा फाउन्डेसनले मंगलबार काठमाडौमा आयोजना गरेको बारबरा एडम्स खोजी पत्रकारिता सम्मान कार्यक्रममा पूर्व राष्ट्रपति डा. यादवले चुरेको संरक्षणका लागि आफुले पटक पटक ध्यानाकर्षण गराउदा पनि कसैले पनि ध्यान नदिएको गुनासो गर्नुभएको हो ।

यादवले चूरे संरक्षणका लागि सरकार सम्बद्ध सबै निकायको समन्वय आवश्यक हुने बताउनुभयो । यादवले चुरेको संवेदनशीलताका बारेमा तराईका बासिन्दा विस्तारै सचेत हुन थालेको भन्दै चुरे प्रभावित क्षेत्रका सांसद अझ बढी गम्भीर हुनुपर्ने धारणा राख्नुभयो । उहाँले चूरे बिनासको अध्ययन गर्दै यसको समोचित संरक्षणमा जुट्न समेत आग्रह गर्नुभयो ।

कार्यक्रममा पूर्वराष्ट्रपति यादवले यसवर्षको बारबरा एडम्स खोजी पत्रकारिता सम्मान पत्रकार दिलिप पौडेललाई प्रदान गर्नुभयो । पुरस्कारको राशी १ लाख १ रुपैयाँ रहेको छ ।

बारबरा फाउन्डेसनले आहृवान गरेको अपिल अनुसार पुरस्कारका लागि ४५ वटा आवेदन परेको थियो । त्यसमध्ये निर्णायक समितिको ३ चरणको छनोट प्रक्रियाबाट पौडेललाई चयन गरिएको फाउण्डेसनले जनाएको छ ।

पत्रकार तथा लेखिका बारबरा एडम्सले खोजी पत्रकारिताको संस्थागत विकासका लागि १० लाख राशीको अक्षयकोष स्थापना गर्नुभएको थियो । यो पुरस्कार सन् २०१६ देखि प्रदान गर्न थालिएको हो ।