काठमाडौं, १ जेठ । श्रीलंकाको कोलम्बोस्थित राजगिरियामा रहेको नेपाली राजदूतावासको जग्गा दुईपटक निजी व्यक्तिलाई बिक्री गरेको भेटिएको छ।

राजगिरियामा नेपाली राजदूतावास स्थापना गर्न सन् १९८९ मे १८ मा ३ लाख ६० हजार अमेरिकी डलर खर्चिएर १.५ एकड (११.९३ रोपनी) जग्गा खरिद गरिएको थियो। हाल यो जग्गा उपयोगविहीन छ।

श्रीलंकाको सरकारी मूल्यांकनअनुसार हालको अवस्थामा उक्त जग्गाको मूल्य ६५ लाख डलर (करिब १ अर्ब रुपैयाँ) छ। तर, उक्त जग्गाको आधिकारिक जग्गाधनी पुर्जा हालसम्म राजदूतावासले प्राप्त गरेको छैन।

राजदूतावासले श्रीलंकाको घरजग्गा व्यवस्थापन गर्ने सरकारी निकायमा खोजी गर्दा नेपाल सरकारको नाममा रहेको उक्त जग्गामध्ये एक एकड (७.९५ रोपनी) जग्गा सन् १९९४ मे ९ सम्म दुईपटक निजी व्यक्तिलाई बिक्री भइसकेको विवरण पत्ता लगाएको छ।

महालेखापरीक्षकको कार्यालयले उक्त जग्गा नेपाल सरकारको स्वामित्वमा ल्याएर संरक्षण तथा उपयोग गर्न सरकारलाई निर्देशन दिएको छ।