काठमाडौं, २० वैशाख । राष्ट्रपति रामचन्द्र पौडेलले संवैधानिक परिषद् (काम, कर्तव्य, अधिकार र कार्यविधि) सम्बन्धी ऐन, २०६६ लाई संशोधन गर्न सरकारले पेश गरेको अध्यादेश फिर्ता गरेका छन्।

प्रधानमन्त्री बालेन्द्र शाहको मन्त्रिपरिषद्ले वैशाख १४ गते पेश गरेको अध्यादेशमाथि पुनर्विचार गर्न भन्दै राष्ट्रपति पौडेलले आइतबार फिर्ता गरेका हुन्। सरकारले पेश गरेका अरु सातवटा अध्यादेश भने राष्ट्रपतिबाट स्वीकृत भएका छन्।

राष्ट्रपति कार्यालयका प्रवक्ता रितेशकुमार शाक्यले गत असारमा संघीय संसदले पारित गरेर पठाएको र मंसिरमा पेश भएको अध्यादेश फिर्ताको सन्दर्भ उल्लेख गर्दै यसपटक पनि अध्यादेश फिर्ता भएको जनाएका छन्।

घुमाउरो रुपमा प्रवक्ता शाक्यले असार र मंसिरमा आएको प्रावधानप्रति चित्त नबुझेर फिर्ता गरिएको अवस्थामा यसपटक अध्यादेशले ती कुरालाई बेवास्ता गरेको उल्लेख गरेका छन्।