काठमाडौं, १४ वैशाख । नेपाली कांग्रेसले बोलाइएको संसद् स्थगित गरेर अध्यादेशमार्फत शासन चलाउने सरकारको कदमप्रति गम्भीर असहमति जनाएको छ।

पार्टी प्रवक्ता देवराज चालिसेले एकातिर बोलाइएको संसद् स्थगित गर्ने र अर्कोतर्फ संसद्‌लाई छलेर अध्यादेश ल्याउने कार्य लोकतन्त्रको मर्यादाविपरीत भएको बताएका हुन्।

अध्यादेशमार्फत मुलुक चलाउने कार्यले संसद्को सर्वोच्चतालाई अवमूल्यन गर्ने उनको भनाइ छ। उनले जनताको थलोका रूपमा रहेको संसद्‌मा सबै विषय पारदर्शी रूपमा छलफल भएर त्यहीँबाट कानून निर्माण हुनुपर्नेमा जोड दिए।

उनले भने, ‘एकातिर बोलाएको संसद् स्थगित गर्ने, अर्कोतर्फ संसद्‌लाई छलेर अध्यादेश ल्याउने कदमहरु लोकतन्त्रको लागि मर्यादित कदम होइन। त्यसले अनुकुलता प्रदान गर्दैन, जवाफदेहीता स्थापित गर्दैन। संसद्को सर्वोच्चतालाई अवमूल्यन गर्छ। जनताको थलोमा हरेक कुराहरु पारपर्दी रुपमा छलफल होस्। त्यसैबाट कानूनहरु बन्दै जाउन् भन्ने हाम्रो अपेक्षा हो। सरकारको यस कदममा हामी गम्भीर असहमति व्यक्त गर्दछौँ।’