काठमाडौं । मध्यपूर्वको अत्यन्त संवेदनशील क्षेत्र होर्मुज जलडमरूमध्य वरिपरि सुरक्षा अवस्था झन् जटिल बन्दै गएको छ । शुक्रबार अमेरिकी ए–१० वार्थोग आक्रमणकारी विमान उक्त क्षेत्र नजिकै दुर्घटनाग्रस्त भएको खबर सार्वजनिक भएको छ । यद्यपि दुर्घटनाको ठ्याक्कै स्थान अझै खुल्न सकेको छैन । राहतको पक्ष के भने विमानका चालकलाई सुरक्षित रूपमा उद्धार गरिएको छ ।

यससँगै जोडिएको अर्को गम्भीर घटनामा, अमेरिकी एफ–१५ई स्ट्राइक इगल लडाकु विमान इरान भित्र खसेको पुष्टि भएको छ । उक्त घटनामा पाइलटलाई सफलतापूर्वक उद्धार गरिए पनि विमानमा रहेका ‘हथियार प्रणाली अधिकृत’ अझै बेपत्ता छन् । उनी दुर्घटनापछि सुरक्षित रूपमा बाहिर निस्कन सके वा नसकेकोबारे हालसम्म कुनै स्पष्ट जानकारी नआएको ट्रम्प निकट फक्स न्युजले जनाएको छ ।

बेपत्ता चालकदल सदस्यको खोजीका लागि पठाइएको उद्धार टोलीसमेत सुरक्षित रहन सकेन । खोज तथा उद्धार अभियानमा संलग्न दुई वटा हेलिकोप्टरमाथि “शत्रु पक्षबाट गोलीबारी” भएको बताइएको छ । आक्रमणका कारण दुवै हेलिकोप्टरमा क्षति पुगेको र केही सैनिक घाइते भएको जानकारी आएको छ । तर कठिन परिस्थितिका बाबजुद ती हेलिकोप्टरहरू सुरक्षित रूपमा अवतरण गर्न सफल भएका छन् ।

होर्मुज जलडमरूमध्य विश्व ऊर्जा आपूर्तिको दृष्टिले अत्यन्त महत्वपूर्ण मार्ग हो, जहाँ सानो तनावले पनि ठूलो अन्तर्राष्ट्रिय प्रभाव पार्न सक्छ । लगातार दुई वटा अमेरिकी सैन्य विमान दुर्घटना हुनु र उद्धार टोलीसमेत आक्रमणमा पर्नु सामान्य घटना नभई गम्भीर सामरिक संकेतका रूपमा हेरिएको छ ।

यी घटनाहरूले अमेरिका–इरान सम्बन्ध झन् तनावपूर्ण दिशातर्फ अघि बढिरहेको देखाउँछन् । अबको अवस्था केवल सैन्य दुर्घटनाको सीमा पार गरेर सम्भावित क्षेत्रीय टकरावतर्फ उन्मुख हुन सक्ने चिन्ता बढ्दै गएको छ ।