काठमाडौं — प्रधानमन्त्री वालेन्द्र शाह को प्रेस तथा अनुसन्धान विज्ञमा खोज पत्रकार, लेखक तथा प्राध्यापक दिपा दाहाल नियुक्त भएकी छन्। प्रधानमन्त्रीको सल्लाहकार तथा सचिवालय व्यवस्थापन कार्यविधि, २०७४ अनुसार उनलाई उक्त जिम्मेवारी प्रदान गरिएको हो।

झण्डै दुई दशकभन्दा लामो समयदेखि पत्रकारिता र प्राज्ञिक क्षेत्रमा सक्रिय दाहालले शुक्रबारदेखि औपचारिक रूपमा आफ्नो कार्यभार सम्हालेकी छन्। उनी भ्रष्टाचार नियन्त्रण, सुशासन र सामाजिक न्यायका विषयमा निरन्तर लेखन तथा अनुसन्धान गर्दै आएकी व्यक्तिका रूपमा परिचित छन्।

दाहालसँग रेडियो, टेलिभिजन, छापा तथा अनलाइन माध्यममा २० वर्षभन्दा बढीको व्यावसायिक अनुभव रहेको छ। पछिल्लो समय उनी उकालो डटकम मा वरिष्ठ संवाददाताका रूपमा खोज पत्रकारितामा संलग्न थिइन्। पद्मकन्या बहुमुखी क्याम्पस मा विगत ७ वर्षदेखि पत्रकारिता अध्यापन गर्दै आएकी दाहाल सञ्चार सीप तथा मौलिक नेतृत्वसम्बन्धी तालिम पनि दिँदै आएकी छन्। उनी ‘कोभिड: नसोचेको, नभोगेको संकट’ नामक अनुसन्धानमूलक पुस्तककी लेखिका समेत हुन्।

दाहालले राष्ट्रिय तथा अन्तर्राष्ट्रिय स्तरका विभिन्न खोज पत्रकारितासम्बन्धी पुरस्कारहरू समेत प्राप्त गरिसकेकी छन्, जसले उनको व्यावसायिक विश्वसनीयता र दक्षतालाई थप मजबुत बनाएको छ।