काठमाडौं : राष्ट्रिय स्वतन्त्र पार्टी (रास्वपा) का सभापति रवि लामिछानेले आफ्नो पार्टीलाई जनताले सिंहदरबार चलाउन मात्र नभई बदल्ने जिम्मेवारी दिएको बताएका छन्।

बिहीबार प्रतिनिधि सभाको बैठकलाई सम्बोधन गर्दै लामिछानेले भने, “हामीलाई सिंहदरबार चलाउन होइन, सिंहदरबार बदल्न दिएको हो। हामीले बदल्न सुरु गरिसकेका छौं।”

उनले जनताको मतादेशलाई गुन तिर्ने प्रतिबद्धता समेत व्यक्त गरे। “म जनतालाई आभार मात्र प्रकट गर्दिनँ। यो रोस्ट्रमबाट प्रतिज्ञा गर्छु — यो मतादेशको गुन हामी जिम्मेवारी पूरा गरेर तिर्छौं,” लामिछानेले भने।

“हामीमाथि चौबिसै घण्टा निगरानी गरिदिनुहोला”

सम्बोधनका क्रममा लामिछानेले प्रतिपक्षी दलहरूलाई रास्वपामाथि निरन्तर निगरानी गर्न आग्रह गरे। उनले भने, “हामीमाथि चौबिसै घण्टा निगरानी गरिदिनुहोला।”

प्रतिनिधि सभाको पहिलो बैठकमा बोल्न उनलाई २५ मिनेट समय दिइएको थियो।

लामिछानेको यो सम्बोधनले सिंहदरबारमा नयाँ शक्तिको आगमनसँगै परिवर्तनको सन्देश दिन खोजेको देखिन्छ। रास्वपाले पुरानो राजनीतिक संस्कृति र संरचनालाई बदल्ने दाबी गर्दै आएको छ।

यो सम्बोधनमा उनले सुशासन, भ्रष्टाचार नियन्त्रण र जनताको अपेक्षा पूरा गर्ने विषयमा जोड दिने अपेक्षा गरिएको थियो।