काठमाडौं — प्रधानमन्त्री सुशीला कार्कीले आफ्ना प्रमुख स्वकीय सचिव आदर्श कुमार श्रेष्ठलाई राष्ट्रिय प्रकृति संरक्षण कोष (एनटीएनसी) को अध्यक्षमा मनोनीत गरेकी छन्। कोषकी संरक्षकको हैसियतमा प्रधानमन्त्री कार्कीले श्रेष्ठलाई पाँच वर्षका लागि यो पदमा नियुक्त गरेको प्रधानमन्त्रीका प्रेस सल्लाहकार राम रावलले जानकारी दिएका छन्।

यसअघि ऐनबहादुर शाहीले राजीनामा दिएपछि यो पद रिक्त रहेको थियो। श्रेष्ठ सिन्धुलीका हुन् र लामो समयदेखि अदालतमा कार्यरत रहेका व्यक्ति हुन्। उनी यसअघि प्रधानमन्त्री सचिवालयमा आफ्नी पत्नी संगीता श्रेष्ठलाई नियुक्त गरेको भन्दै विवादमा परेका थिए। विवादपछि उनलाई सचिवालयबाट हटाइएको थियो।

प्रधानमन्त्री कार्कीले राष्ट्रिय समाचार समिति (रासस) सँगको अन्तर्वार्तामा प्रमुख स्वकीय सचिव आदर्श कुमार श्रेष्ठले आफ्नो जीवनमा बिर्सन नसकिने गुन लगाएको बताएकी थिइन्। उनले खुलेरै श्रेष्ठको प्रशंसा गरेकी थिइन्।

“रावल जी पत्रकार मात्र होइनन्, उहाँमा इमानदारी र मानिसलाई सहयोग गरूँ भन्ने भावना छ। प्रमुख स्वकीय सचिव श्रेष्ठ अदालतका कर्मचारी हुन्। अदालतमा काम गर्ने प्रविधि र कानुनमा राम्रो ज्ञान भएको कानुनकै विद्यार्थी पनि हुन्। धेरै प्रधानन्यायाधीशको निजी सहायकका रूपमा काम गरेको व्यक्ति हुन्। म प्रधानन्यायाधीश हुँदा पनि निजी सहायक नै थिए। सचिवालयमा २०/२५ जनाले गर्ने काम यिनीहरूले गरे,” उनले भनेकी थिइन्।

प्रधानमन्त्री कार्कीले श्रेष्ठ लामो समय अदालतमा काम गरेको, आइटी र कानुनमा राम्रो दख्खल भएको बताइन्। “धेरै प्रधानन्यायाधीशको सचिवालयमा निजी सहायक भएर सबैको विश्वास जितेर काम गरेको हो। यो उमेरमा मलाई सफल पार्न ७५ प्रतिशत आदर्शको हात छ। उसैको देनका कारण सम्भव भयो। प्रधानमन्त्रीको स्वकीय सचिवालयमा पहिला ४०–५० जना कर्मचारी हुन्थे। म सबैलाई मुरीमुरी धन्यवाद दिन चाहन्छु,” उनले थपिन्।

यसैबीच, मन्त्रिपरिषद्को आजकै बैठकले गृहमन्त्री ओमप्रकाश अर्याललाई राष्ट्रिय सभा सदस्यमा मनोनीत गर्न राष्ट्रपतिसमक्ष सिफारिस गरेको छ।

यो नियुक्तिले प्रधानमन्त्री कार्कीको सचिवालय र निकट सहयोगीहरूलाई महत्वपूर्ण जिम्मेवारी दिएको छ, जसले राजनीतिक तथा प्रशासनिक वृत्तमा चर्चा निम्त्याएको छ।