काठमाडौं, —भारतीय प्रधानमन्त्री नरेन्द्र मोदीले रवि लामिछाने र बालेन्द्र शाहसँग टेलिफोन संवाद गरेका छन्।
मोदीले सामाजिक सञ्जालमार्फत जानकारी दिँदै नेपालमा सम्पन्न प्रतिनिधिसभा निर्वाचनमा लामिछानेको विजय तथा राष्ट्रिय स्वतन्त्र पार्टीको उल्लेखनीय सफलताप्रति बधाई दिएका छन्।
प्रधानमन्त्री मोदीले लामिछाने र शाहसँग छुट्टा–छुट्टै टेलिफोन संवाद गरेका थिए। वार्ताका क्रममा उनले दुवै नेतालाई निर्वाचन सफलताका लागि बधाई दिँदै नयाँ सरकार गठनका लागि शुभकामना व्यक्त गरेका थिए।
मोदीले भारत र नेपालबीचको सम्बन्धलाई अझ मजबुत बनाउने प्रतिबद्धता व्यक्त गर्दै पारस्परिक समृद्धि, प्रगति र दुवै देशका नागरिकको हितका लागि सहकार्य जारी रहने बताएका छन्। साथै आगामी वर्षहरूमा भारत–नेपाल सम्बन्ध अझ उचाइमा पुग्ने विश्वास पनि व्यक्त गरेका छन्।
रास्वपाको ऐतिहासिक सफलता
यस वर्ष फागुन २१ मा सम्पन्न प्रतिनिधिसभा निर्वाचनमा राष्ट्रिय स्वतन्त्र पार्टीले प्रत्यक्षतर्फ मात्रै १२५ सिट जितेको छ। समानुपातिकतर्फको मतगणनामा पनि रास्वपा अग्रस्थानमा रहेको बताइएको छ।
दुवै प्रणालीको सिट जोड्दा रास्वपा एक्लैले दुई तिहाइ सिट नजिक पुग्ने अवस्था देखिएको राजनीतिक विश्लेषकहरूले बताएका छन्।
रास्वपाले स्पष्ट बहुमतसहित सरकार गठन गर्ने सम्भावना देखिएपछि भारतीय प्रधानमन्त्री मोदीले पार्टी नेतृत्वसँग संवाद गरेको जनाइएको छ।
यसअघि पनि मोदीले सफलतापूर्वक निर्वाचन सम्पन्न गराएकोमा नेपाल सरकारलाई बधाई दिएका थिए भने भारतको विदेश मन्त्रालयले पनि आगामी सरकारसँग सहकार्य गर्ने प्रतिबद्धता जनाएको छ।
#RSP
प्रतिक्रिया दिनुहोस्