काठमाडौं । बिहीबार सम्पन्न प्रतिनिधिसभा निर्वाचनको मतगणना जारी रहँदा प्रारम्भिक मतपरिणाम आउन थालेका छन्। प्रारम्भिक नतिजाले केही निर्वाचन क्षेत्रमा नयाँ राजनीतिक प्रवृत्तिको संकेत गरेको छ।

निर्वाचन अधिकृत तथा मुख्य निर्वाचन अधिकृतका कार्यालयहरूबाट प्राप्त विवरणअनुसार शुक्रबार बिहान करिब साढे ७ बजेसम्म देशभरका ३८ वटा निर्वाचन क्षेत्रको प्रारम्भिक मतपरिणाम सार्वजनिक भएको छ। तीमध्ये ३३ स्थानमा राष्ट्रिय स्वतन्त्र पार्टी (रास्वपा) का उम्मेदवारहरूले अग्रता कायम गरेका छन्।

प्रारम्भिक नतिजाअनुसार नेपाली कांग्रेसका उम्मेदवारहरू ३ स्थानमा अगाडि छन् भने नेकपा एमालेका उम्मेदवारहरूले २ निर्वाचन क्षेत्रमा अग्रता लिएका छन्। विशेषगरी काठमाडौं उपत्यकाका अधिकांश निर्वाचन क्षेत्रमा रास्वपा उम्मेदवारहरूले सुरुवाती बढत लिएको देखिएको छ, जसलाई राजनीतिक विश्लेषकहरूले नयाँ मतदाताको झुकावसँग जोडेर हेर्न थालेका छन्।

यसैबीच झापा–५ मा नेकपा एमालेका अध्यक्ष केपी शर्मा ओलीलाई रास्वपाका वरिष्ठ नेता बालेन शाहले उल्लेखनीय मतान्तरले पछाडि पारेका छन्। प्रारम्भिक गणनाअनुसार शाहले १,४७६ मत प्राप्त गर्दा ओलीले ३८४ मत मात्र पाएका छन्।

यद्यपि धेरै निर्वाचन क्षेत्रमा अझै मतपेटिका संकलन, सर्वदलीय बैठक तथा अन्य प्राविधिक प्रक्रिया सम्पन्न भएपछि मात्र मतगणना सुरु हुने निर्वाचन कार्यालयहरूले बताएका छन्।

मतगणना निरन्तर जारी रहेकाले प्रारम्भिक नतिजामा आगामी घण्टाहरूमा परिवर्तन आउन सक्ने सम्भावना रहेको निर्वाचन अधिकारीहरूले जनाएका छन्।