विराटनगर । पूर्वप्रधानमन्त्री तथा केपी शर्मा ओली र राष्ट्रिय स्वतन्त्र पार्टीका नेता बालेन्द्र शाह प्रतिस्पर्धामा रहेको झापा निर्वाचन क्षेत्र नम्बर ५ मा १ लाख ६ हजार मत खसेको छ।

झापा–५ मा कुल १ लाख ६३ हजार ३७९ जना मतदाता रहेका थिए। जिल्ला निर्वाचन कार्यालय झापाका अनुसार खसेको मतमध्ये ५६ हजार ९७२ महिला र ४९ हजार ४ सय पुरुष मतदाता रहेका छन्। समग्रमा यो सहभागिता करिब ६५.११ प्रतिशत हाराहारी हो।

जिल्लाभर उत्साहजनक मतदान

जिल्ला निर्वाचन कार्यालय झापाका अनुसार जिल्लाभर प्रारम्भिक अनुमानमा ६५ प्रतिशतभन्दा बढी मतदान भएको देखिएको छ।

जिल्ला निर्वाचन अधिकृत तुलसी कुमार नेपालका अनुसार विभिन्न मतदान केन्द्रबाट प्राप्त प्रारम्भिक विवरणका आधारमा सहभागिता अपेक्षाकृत उत्साहजनक देखिएको हो। “प्रारम्भिक विवरणअनुसार ६५ प्रतिशतभन्दा बढी मत खसेको छ,” उनले जानकारी दिए।

झापा–५ मा उच्चप्रोफाइल उम्मेदवारहरूको प्रतिस्पर्धाका कारण सुरुदेखि नै मतदाताको चासो केन्द्रित थियो। अब सबैको ध्यान मतगणनातर्फ केन्द्रित भएको छ, जहाँ यस क्षेत्रको राजनीतिक सन्देश स्पष्ट हुनेछ।