काठमाडौं : टी–२० विश्वकप अन्तर्गत समूह चरणको रोमाञ्चक खेलमा दक्षिण अफ्रिकाले अफगानिस्तानलाई दुई सुपर ओभरपछि हराएको छ । अहमदाबादको नरेन्द्र मोदी स्टेडियममा भएको खेलमा अफगानिस्तानले दिएको १८८ रनको लक्ष्य पछ्याउँदा दक्षिण अफ्रिकाले १८७ रन बनाएपछि खेल सुपर ओभरमा पुगेको थियो ।

पहिलो सुपर ओभरमा अफगानिस्तानले १८ रन बनाएको थियो । दक्षिण अफ्रिकाले १७ रन मात्र बनाएपछि खेल दोस्रो सुपर ओभरमा पुग्यो । दोस्रो सुपर ओभरमा दक्षिण अफ्रिकाले २४ रनको लक्ष्य दिएको थियो । डेभिड मिलरले ४ बलमा १६ र ट्रिस्टन स्टब्सले २ बलमा ७ रन जोडे ।

२४ रनको लक्ष्य पछ्याउँदा अफगानिस्तानका रहमानुल्लाह गुरबाजले लगातार तीन छक्का प्रहार गर्दै खेल फर्काएका थिए । अन्तिम बलमा ६ रन आवश्यक थियो । केशव महाराजले वाइड दिएपछि ५ रन बाँकी रह्यो । अन्तिम बलमा गुरबाजलाई महाराजले आउट पार्दै दक्षिण अफ्रिकालाई रोमाञ्चक जित दिलाए ।

मुख्य प्रदर्शन

• अफगानिस्तानको ब्याटिङ : रहमानुल्लाह गुरबाजले ४२ बलमा ८४ रन (७ छक्का, ४ चौका) को विष्फोटक पारी खेले । अजमतुल्लाह ओमरजाई २२, राशिद खान २०, नुर अहमद १५ र इब्राहिम जद्रान १२ रनमा रोकिए ।
• दक्षिण अफ्रिकाको बलिङ : लुंगी एनगिडी ३ विकेट, मार्को यानसन, कागिसो रबाडा, जर्ज लिन्डे र केशव महाराजले १–१ विकेट लिए ।
• दक्षिण अफ्रिकाको ब्याटिङ : क्वीन्टन डि कक ४१ बलमा ५९, रायन रिकल्टन २८ बलमा ६१, डेवाल्ड ब्रेभिस २३, डेभिड मिलर २० र मार्को यानसन १६ रन ।
• अफगानिस्तानको बलिङ : अजमतुल्लाह ओमरजाई ३ विकेट, राशिद खान २ विकेट, फजलहक फारुकी १ विकेट ।

अफगानिस्तानका फजलहक फारुकी १९.४ ओभरमा रनआउट भएपछि खेल सुपर ओभरमा पुगेको थियो । कागिसो रबाडाले अन्तिम ओभरमा दुई नोबल गरे पनि अफगानिस्तानले त्यसको फाइदा उठाउन सकेन ।

यो जितपछि दक्षिण अफ्रिकाले समूह चरणमा बलियो सुरुवात गरेको छ । अघिल्लो खेलमा अफगानिस्तान न्यूजिल्यान्डसँग ५ विकेटले पराजित भएको थियो भने दक्षिण अफ्रिकाले क्यानडालाई ५७ रनले हराएको थियो ।