काठमाडौँ, माघ २४ । नेकपा एमालेका अध्यक्ष तथा पूर्वप्रधानमन्त्री केपी शर्मा ओली यतिबेला आफ्नो गृह निर्वाचन क्षेत्र झापा–५ मा केन्द्रित भएका छन्। प्रतिनिधिसभा सदस्य निर्वाचन नजिकिँदै जाँदा उनी मतदातासँग प्रत्यक्ष भेटघाट र संवादमा सक्रिय देखिएका छन्।

२०४८ सालदेखि निरन्तर झापाबाट संसदीय राजनीति गर्दै आएका ओलीले २०६४ सालको पहिलो संविधानसभा निर्वाचनबाहेक प्रायः सबै निर्वाचनमा विजय हासिल गरेका छन्। तर यसपटकको चुनावलाई भने झापा–५ मा फरक र चुनौतीपूर्ण मानिएको छ।

फागुन २१ गते हुने प्रतिनिधिसभा निर्वाचनमा ओलीको मुख्य प्रतिस्पर्धीका रूपमा राष्ट्रिय स्वतन्त्र पार्टी (रास्वपा) का वरिष्ठ नेता तथा काठमाडौँ महानगरपालिकाका पूर्वमेयर बालेन्द्र शाह (बालेन) मैदानमा उत्रिएका छन्। जेनजी आन्दोलनपछि उदाएका बालेनको उपस्थितिले झापा–५ को चुनावी माहोल थप रोचक बनेको छ।

राजनीतिक विश्लेषकहरूका अनुसार यस क्षेत्रमा ओली र बालेनबीच नै मुख्य प्रतिस्पर्धा हुने सम्भावना बलियो छ। दुवै नेताले आफूलाई सम्भावित प्रधानमन्त्रीका उम्मेदवारका रूपमा प्रस्तुत गर्दै मतदाता आकर्षित गर्ने प्रयास गरिरहेका छन्।

यसै सिलसिलामा एमाले अध्यक्ष ओलीले आज पनि झापा–५ का विभिन्न स्थानमा पुगेर मतदातासँग भेटघाट, संवाद र चुनावी सन्देश प्रवाहलाई निरन्तरता दिएका छन्।
(तस्बिरहरू)