काठमान्डौ माघ २२

रौतहट(२ बाट राष्ट्रिय स्वतन्त्र पार्टी रास्वपा का उम्मेदवार सगिर आलम सवार रहेको गाडीको ठक्करबाट चार वर्षीया बालिकाको मृत्यु भएको छ ।

ईशनाथ नगरपालिका(४, मठिया टोलकी करिब चार वर्षीया अलसा खातुनको सवारी दुर्घटनामा ज्यान गएको पुष्टि भएको छ । मृतक अलसा खातुन सोही स्थानका बासिन्दा शेख साजिरकी छोरी हुन् । दुर्घटना आफ्नै वडाभित्र भएको स्थानीयले बताएका छन् ।

स्थानीयका अनुसार बालिकालाई ठक्कर दिएपछि गाडीमा सवार उम्मेदवार सगिर आलम र चालक घटनास्थलबाट फरार भएका छन् । ठक्कर दिने गाडी भने प्रहरीले नियन्त्रणमा लिएको छ ।

प्रहरी स्रोतका अनुसार बा १५ च ४२४४ नम्बरको क्रेटा गाडीले बालिकालाई ठक्कर दिएको हो । दुर्घटनापछि गम्भीर घाइते भएकी बालिकालाई उपचारका लागि अस्पताल लैजाँदै गर्दा मृत्यु भएको जनाइएको छ ।

घटनाबारे थप अनुसन्धान भइरहेको र दोषीमाथि कानुनी कारबाही प्रक्रिया अघि बढाइने प्रहरीले जनाएको छ ।