काठमाडौं, १९ माघ । प्रधानमन्त्री सुशीला कार्कीले आज संघीय संसद् अन्तर्गतको राष्ट्रिय सभामा पहिलोपटक सम्बोधन गरेकी छन्।

गत भदौ २३–२४ गतेको जनजीवन आन्दोलनपछिको परिस्थितिले उनलाई प्रधानमन्त्री बनाएको उनले बताइन्। सम्बोधनको क्रममा उनले स्पष्ट गरिन् कि संसद्मा बोल्न पाउनु व्यक्तिगत इच्छाले नभई परिस्थितिले ल्याएको अवसर हो।

प्रधानमन्त्री कार्कीले भनिन्, “जीवनमा यस्तो मौका पनि आयो। परिस्थितिले ल्याएको हो। रहरले होइन। मैले खोजेर गएको पनि होइन। परिस्थितिले बाध्य बनायो। म आएँ। र अहिले यो अवसर मैले यहाँ पाएँ, सायद जीवनमा फेरि पाउन कठिन छ होला। मैले पाउने आशा गरेको पनि छैन।”

पहिलोपटक संसद्मा सम्बोधन गरेको अनुभवलाई उनले व्यक्तिगत र ऐतिहासिक रूपमा महत्त्वपूर्ण ठानेकी छिन्। उनले थपिन्,

“आज यसलाई जीवनमा एउटा राम्रो अनुभव मान्छु। यस्तो मोड आएकोमा समयले साथ दिएकोमा खुसी लागेको छ। हेर्ने अवसर पनि पाएँ, बोल्ने मौका पनि पाएँ।”

प्रधानमन्त्री कार्कीको यो सम्बोधनले संसद्मा उपस्थित सदस्यहरूबीच ध्यानाकर्षण प्राप्त गरेको छ र आगामी दिनमा उनका कदमहरूमा नयाँ दृष्टिकोण थप्ने अपेक्षा गरिएको छ।