काठमाडौं ६ माघ । सिरहा निर्वाचन क्षेत्र नम्बर–४ यसपटक जिल्लाकै सबैभन्दा चर्चित र रोचक चुनावी मैदान बनेको छ। एउटै निर्वाचन क्षेत्रबाट पाँच जना पूर्वमन्त्रीले उम्मेदवारी दर्ता गरेपछि यहाँको राजनीतिक प्रतिस्पर्धा असाधारण रूपमा चर्किएको छ।

मिर्चैयास्थित निर्वाचन अधिकृतको कार्यालयमा सोमबार पाँच जना पूर्वमन्त्रीले प्रतिनिधि सभा सदस्यका लागि मनोनयन दर्ता गराएका हुन्। विभिन्न दलका अनुभवी र प्रभावशाली नेताहरू एउटै क्षेत्रमा आमनेसामने भएपछि सिरहा–४ लाई ‘हेभीवेट प्रतिस्पर्धा’को केन्द्रका रूपमा हेरिन थालिएको छ।

जनता समाजवादी पार्टी (जसपा) नेपालबाट केन्द्रीय उपाध्यक्ष राजकिशोर यादव, जनमत पार्टीबाट वीरेन्द्रप्रसाद महतो, नेपाली कम्युनिस्ट पार्टी (नेकपा)बाट अजयशंकर नायक, नेकपा (एमाले)बाट धर्मनाथ साह र बहुजनशक्ति पार्टीबाट विश्वेन्द्र पासवानले उम्मेदवारी दिएका छन्।

अनुभवी नेताहरूको दोहोरिएको भिडन्त

राजकिशोर यादव सिरहा–४ का पुराना र प्रभावशाली नेता मानिन्छन्। उनी तीन पटक सांसद र दुई पटक मन्त्री भइसकेका छन्। यसअघि सिरहा–२ बाट चुनाव जितेका यादव त्यसअघि यही सिरहा–४ बाट निर्वाचित भएका थिए। संगठनात्मक पकड र लामो संसदीय अनुभव उनका मुख्य बलका रूपमा लिइन्छ।

जनमत पार्टीका वीरेन्द्रप्रसाद महतो पनि यस क्षेत्रका परिचित अनुहार हुन्। उनी यसअघि यही क्षेत्रबाट जसपा नेपालबाट चुनाव जितेर सांसद हुँदै मन्त्री बनेका थिए। दुई पटक सांसद भइसकेका महतो त्यसअघि समानुपातिक सांसदसमेत रहिसकेका छन्। तर, जसपा नेपालबाट विभाजित भएर बनेको जसपामा संलग्न भएका उनी यसपालि चुनावको मुखैमा जनमत पार्टीबाट टिकट लिएर पुनः मैदानमा उत्रिएका छन्।

नेकपाका अजयशंकर नायक समानुपातिक सांसद हुँदै मन्त्री बनेका नेता हुन्। २०७४ सालमा प्रत्यक्ष चुनाव लडेका नायक त्यतिबेला जसपा नेपालका राजकिशोर यादवसँग पराजित भएका थिए। यसपालि भने उनी बदला र पुनरागमनको प्रयासमा देखिएका छन्।

एमालेका धर्मनाथ साह प्रत्यक्ष र समानुपातिक गरी दुई पटक सांसद र एक पटक मन्त्री भइसकेका अनुभवी नेता हुन्। लामो राजनीतिक यात्रासँगै स्थानीय तहमा पनि उनको प्रभाव उल्लेखनीय मानिन्छ।

बहुजनशक्ति पार्टीका विश्वेन्द्र पासवान समानुपातिक सांसद हुँदै मन्त्री बनेका नेता हुन्। दलित राजनीति र पहिचानको मुद्दालाई उठाउँदै आएका पासवानले यसपालि प्रत्यक्ष निर्वाचनमार्फत जनमत परीक्षण गर्ने रणनीति लिएका छन्।

नयाँ अनुहार पनि मैदानमा

पूर्वमन्त्रीहरूको भिडन्तसँगै यस क्षेत्रमा नयाँ अनुहारहरू पनि चुनावी मैदानमा उत्रिएका छन्। नेपाली कांग्रेसबाट चन्द्रकला देवी यादव र राष्ट्रिय स्वतन्त्र पार्टीबाट तपेश्वर यादवले उम्मेदवारी दिएका छन्। दुवैले यसअघि कुनै पनि निर्वाचन नलडेका नयाँ उम्मेदवार हुन्।

विश्लेषकहरूका अनुसार नयाँ उम्मेदवारहरूका लागि अनुभवी र चर्चित नेताबीचको प्रतिस्पर्धा चुनौतीपूर्ण भए पनि मत विभाजनको सम्भावनाले उनीहरूलाई पनि अवसर सिर्जना गर्न सक्छ।

१९ उम्मेदवार, अझै बढ्ने सम्भावना

निर्वाचन अधिकृत शिव वाग्लेका अनुसार अहिलेसम्म सिरहा–४ बाट विभिन्न दल र स्वतन्त्र गरी १९ जनाको उम्मेदवारी दर्ता भइसकेको छ। उम्मेदवारी दर्ताको समय बाँकी रहेकाले यो संख्या अझै बढ्न सक्ने अनुमान गरिएको छ।

पाँच जना पूर्वमन्त्री, दुई नयाँ अनुहार र दर्जनभन्दा बढी उम्मेदवारको उपस्थितिले सिरहा–४ लाई यसपटक केवल जिल्लाकै होइन, मधेस प्रदेशकै चासोको निर्वाचन क्षेत्र बनाएको छ। अब यहाँको प्रतिस्पर्धा कसले आफ्नो पक्षमा मोड्छ भन्ने निर्णय मतदाताको हातमा छ।