पुराना फिल्म निर्माता तथा शम्भु प्रधानले आफ्नो पुरानो फिल्म सम्झनाको गीतको अंश अनुमति बिना चलचित्र कृमा राखिएकोमा जरिवाना तिराएपछि त्यसबारे नेपाली चलचित्र क्षेत्र विभाजित भएको छ । कतिपयले प्रधानको यस्तो कामबाट नेपाली चलचित्र क्षेत्रमा चोरी प्रबृत्ति निरुत्साहित हुने बताएका छन् भने कतिपयले जरिवाना तिराएकोमा विरोध समेत गरेका छन् ।

पुराना श्रष्टाहरुको गीत चोर्ने र उनीहरुलाई अपमान गर्ने श्रृंखला चलिरहेको सन्दर्भमा शम्भु प्रधानले उठाएको कदमबाट त्यो श्रृंखला कम हुने अपेक्षा गर्न सकिन्छ । तर चर्को जरिवानाको माग गरेकोमा र ११ लाख जरिवाना लिएकोमा भने कतिपयले विरोध गरेका छन् ।

कलाकार दिक्पाल कार्कीले गीत संगीतमा भइरहेको चोरीलाई निरुत्साहित गर्न शम्भु प्रधानको कदम सही भएको बताएका छन् । उनले पूराना गीत संगीत चोरेर अनुमति बिना नै पुराना श्रष्टाको नाम समेत उल्लेख नगरी नयाँ गीत बनाउने प्रचलन बढेकोमा शम्भु प्रधानको कदमले त्यसलाई निरुत्साहित गर्ने अपेक्षा लिएका छन् ।

पुराना गीत संगीत पूर्ण वा आंशिक रुपमा नयाँ गीतमा समावेश गर्नुपरेमा पुराना श्रष्टासँग अनुमति लिएर र सहमति गरेर सम्मानजनक तरिकाले राख्दा उचित हुने तथा त्यसो गरेमा यस्ता विवादहरु नआउने कलाकार दिक्पाल कार्कीले बताएका छन् । शम्भु प्रधानले ११ लाख लिएको भन्दै नकारात्मक टिकाटिप्पणी भइरहेकोमा पनि कार्कीले आपत्ति जनाएका छन् । बरु शम्भु प्रधानको कदमले कपिराइट संरक्षण गर्ने कार्कीको भनाई छ ।