काठमाडौं २१ भदौ, । काठमाडौं महानगरपालिकाका मेयर बालेन शाहले बसन्तपुरमा इन्द्रजात्राका लागि पुगेका राष्ट्रपति रामचन्द्र पौडेलको स्वागत आफैंले गरेका छन् भने प्रधानमन्त्री केपी शर्मा ओलीको स्वागतका लागि कार्यकारी प्रमुखलाई पठाइदिएर आफू अनुपस्थित भएका छन् ।

काठमाडौं महानगरपालिकाका प्रमुख प्रशासकीय अधिकृत सरोज गुरागाइँले प्रधानमन्त्री ओलीको स्वागत गरेका थिए।

गत वर्षको इन्द्रजात्रामा अनुपस्थित भएका मेयर शाह यसपटक भने बसन्तपुर पुगेका थिए ।

प्रत्येक वर्ष भाद्र शुक्ल चतुर्ददशीका दिन पर्ने यो पर्व काठमाडौँ, ललितपुर, भक्तपुर, धुलिखेल, दोलखालगायतका स्थानमा मनाइन्छ ।

उपत्यकाबासीले विशेष महत्व दिएर मनाउने भएकाले काठमाडौं महानगरपालिकाले बसन्तपुरमा विशेष तयारीका साथ कार्यक्रम गर्दै आएको छ ।

इन्द्रजात्रामा राष्ट्रपति, प्रधानमन्त्रीसहित उच्च पदस्थहरूको सहभागिता हुने गर्दछ । आयोजकका हिसाबले काठमाडौं महानगरका मेयर र उपमेयरले उनीहरूको स्वागत गर्ने गर्दछन् ।
काठमाडौं महानगर पालिकाका कार्यकारी प्रमुख गुरागाईंलाई मेयर साहको सहमति विना पठाइदिएको भन्दै उनले विरोध गर्दै आएका छन् । निर्वाचित प्रमुख र कर्मचारी प्रमुखका कारण महानगरपालिका नै अनिर्णयको बन्दी बन्दै आएको छ। साह र ओलीको भने सोसल सन्जालमा भनभन हुँदै आएको छ ।