काठमाडौँ।  परराष्ट्रमन्त्री प्रदीप ज्ञवालीले राष्ट्रियता र समानतालार्ई सर्वोपरि राखी सरकारले मित्रराष्ट्रसँग सम्बन्ध सुदृढ गर्ने बताउनुभएको छ ।

नेपाल र भारतबीचको सम्बन्धलाई अझ बढी सुदृढ बनाउने र प्रधानमन्त्री केपी शर्मा ओलीको निकट भविष्यमा हुन लागेको भारत भ्रमणका बेला राष्ट्रहितका लागि उठाउनु पर्ने मुद्दाहरुका बारेमा आज नेपाल भारत मैत्री समाजले आयोजना गरेको कार्यक्रममा परराष्ट्रमन्त्री ज्ञवालीले वर्तमान सरकारले झण्डै तीन चौथाइ जनमत प्राप्त गरेको र अब देशमा राजनीतिक स्थीरता आएकाले जनअपेक्षा अनुरुप सरकार पञ्चशीलको सिद्धान्तमा आधारित विदेश नीतिमा अधि बढ्छ भन्नुभयो ।

उहाँले नेपाल र भारतबीच असल छिमेकीको सम्बन्ध अझ विस्तार गरिने बताउनुभयो । उहाँले विकास र समृद्धिका लागि विदेशमा रहेका देशका राजदूतावासलाई आर्थिक कूटनीतिकका माध्यमबाट लगानी भित्रयाउन परिचालन गरिने बताउनुभयो ।

कार्यक्रममा नेपालका लागि भारतीय राजदूत मञ्जित सिंह पुरीले नेपालको विकासमा भारत सबै किसिमको सहयोग गर्न तयार छ भन्दै नेपालले जलविद्युत्,पर्यटन र लगानीमैत्रीमा जोड दिनुपर्ने सुझाब दिनुभयो ।

कार्यक्रममा वत्ताहरुले प्रधानमन्त्रीको भारत भ्रमणका बेला नेपालको भारतसँगको व्यापार घाटा कम गर्न, जलविद्युत् पर्यटन र उद्योगक्षेत्रमा भारतीय लगानी बृद्धि गर्ने बारेमा आपसी छलफल गरिनुपर्ने सुझाब दिनुभएको थियो ।

एकीकृत राष्ट्रिय प्रजातन्त्र पार्टी(राष्ट्रवादी)का अध्यक्ष डा प्रकाशचन्द्र लोहनी,नेकपा(माओवादी केन्द्र)का नेता देवेन्द्र पौडेल,नेपाली काँग्रेसका नेता दीपकुमार उपाध्याय,सांसद ह्रदयेस त्रिपाठी, नेत्री हिसिला यमी,डा सुन्दरमणि दिक्षितले नेपाल र भारतबीच जनस्तरमा रहेको प्रगाढ आर्थिक,सामाजिक,साँस्कृतिक र धार्मिक सम्बन्धबारे चर्चा गर्नु भएको थियो ।