काठमाडौ २ जेठ । लामो रस्साकस्सीपछि सङ्घीय निजामती सेवा विधेयक राज्य व्यवस्था समितिबाट पारित पारित भएको छ ।
प्रतिनिधि सभाअन्तर्गतको राज्य व्यवस्था तथा सुशासन समितिबाट विधेयक सर्वसम्मत पारित गर्ने निर्णय गरेको सभापति रामहरि खतिवडाले जानकारी दिनुभयो ।
सङ्घीय मामिला तथा सामान्य प्रशासनमन्त्री राजकुमार गुप्ताले विगत नौ वर्षदेखि विचाराधीन विधेयकलाई समितिले टुङ्गोमा पुर्याउन सफल भएकोमा धन्यवाद व्यक्त गर्नुभयो । निजामती सेवा विधेयक २०८० फागुन २१ गते प्रतिनिधि सभामा दर्ता भएको थियो ।
सैद्धान्तिक छलफल गरेर प्रतिनिधि सभाले दफावार छलफलका लागि २०८१ जेठ १५ गते राज्य व्यवस्था समितिमा पठाएको थियो ।
विवादित मुख्य दुई विषय कुलिङ पिरियड र कर्मचारीको अवकाश उमेर ६० वर्ष पुर्याउँदा अपनाउने कार्यान्वयन विधिमा सहमति जुटेपछि विधेयक पारित भएको समितिले जनाएको छ ।
निजामती कर्मचारीको उमेरहद ६० वर्ष पुर्याउने सहमति भएको छ । त्यस्तै कुलिङ पिरियड दुई वर्ष राख्ने सहमति भएको छ ।
आज समितिको बैठकमा सरकारको तर्फबाट गृहमन्त्री रमेश लेखकले दुवै विषयमा राखेका प्रस्ताव समितिबाट पारित भएपछि विधेयक समितिबाट पास भएको हो । विधेयकमा निजामती सेवामा प्रवेश गर्ने उमेर पुरुषको ३५ वर्षसम्म र महिलाको ३९ वर्षसम्म राखिएको छ ।
विधेयकमा पालिकाका कर्मचारीहरूका लागि एक पटकका लागि अन्तरप्रदेश सरुवा हुन पाउने व्यवस्थासमेत गरिएको छ ।
प्रतिक्रिया दिनुहोस्