काठमाडौं १६ माघ । हालै सार्वजनिक एक सर्वेक्षणअनुसार ८५ प्रतिशत ग्रीनल्यान्डका नागरिक अमेरिकामा जोडिन असहमत देखिएका छन् । अमेरिकी राष्ट्रपति डोनाल्ड ट्रम्पले अमेरिकाको राष्ट्रिय सुरक्षाको लागि ग्रीनल्यान्ड किन्ने र ग्रीनल्यान्डवासी अमेरिकामा जोडिन तयार भएको बताएपछि यस्तो सर्वेक्षण नतिजा आएको जर्मनीको विश्व च्यानल डीडब्ल्यूले उल्लेख गरेको छ ।

डीडब्ल्यूका अनुसार ६ प्रतिशतमात्रै अमेरिकासँग जोडिने पक्षमा छन् । ९ प्रतिशत ग्रीनल्यान्डवासी अनिर्णयमा छन् ।

डेनमार्कको सार्वभौमसत्ता भएको ग्रीनल्यान्डमा ५७ हजार नागरिक छन् । विश्वको सबैभन्दा ठूलो टापु ग्रीनल्यान्डमा अमेरिकी सैन्य शिविर पनि छ । खनिज तथा धातुहरुको खानीको रुपमा चित्रित ग्रीनल्यान्डलाई लिने चुनावी एजेन्डालाई ट्रम्पले राष्ट्रपतिको शपथपछि पनि दोहो¥याएका छन् ।

क्यानडालाई ५१औं राज्य बनाउने, ग्रीनल्यान्ड खरिद गर्ने र पानामा नहरलाई फेरि अमेरिकाकै स्वामित्वमा ल्याउने उद्घोष गर्दै आएका ट्रम्पले आफ्नो कार्यकालमा अमेरिकाको क्षेत्रफल बढ्ने बताउँदै आएका छन् ।