अर्घाखाँची,  १३ माघ । ‘कृषि, पर्यटन, उद्योग र व्यापार, स्थानीय उत्पादनको प्रयोग रोजगारीको मुख्य आधार’ भन्ने नारा सहित संचालन भएको छैठौं अर्घाखाँची महोत्सव एवम् कृषि, पर्यटन तथा औद्योगिक व्यापार मेला २०८१ सम्पन्न भएको छ । सन्धिखर्कको कुँडुले फाँटमा पौष २९ गतेदेखि माघ १२ गतेसम्म महोत्सव संचालन भएको हो ।

जिल्लामा मेला महोत्सव हुँदा अर्थतन्त्र पनि चलाएमान हुने सन्धिखर्क नगरपालिकाका प्रमुख कृष्णप्रसाद श्रेष्ठले बताएका छन् । श्रेष्ठले मेलामा स्थानीय, राष्ट्रिय र अन्तर्राष्ट्रिय स्तरमा उत्पादन भएका सामानहरु एकै स्थानमा पाईदा सेवाग्राही उत्साहित भएको बताए । यस्तै अर्घाखाँची उद्योग वाणिज्य संघका अध्यक्ष प्रदिप मिश्रले महोत्सवमा १३ दिन नै दर्शकको उत्साहजनक उपस्थिति रहेको बताए । उनले दर्शकहरुको उपस्थितिले कम्तिमा वर्षमा एकपटक मेला महोत्सव लगाउन आवश्यक रहेको बताए । उनले मेलालाइ शान्त र व्यवस्थित वातावरणमा सम्पन्न गर्न सहयोग पुर्‍याउने सबैलाई धन्यवाद समेत ज्ञापन गरे ।