काठमाडौं ९ माघ ।  प्रिम सहकारी ठगीको अभियोग सामना गर्न राष्ट्रिय स्वतन्त्र पार्टीका सभापति रवि लामिछाने रुपन्देही पुगेका छन्। मंगलबार भैरहवा विमानस्थल हुँदै गएका लामिछाने बुधबार जिल्ला अदालत रुपन्देहीमा उपस्थित हुनेछन्।

बुधबार १० बजेअघि नै उनी अदालतमा उपस्थित हुने तयारी छ। बुधबार नै पेसी तोकेर अदालतमा उनको बयान सुरु हुनेछ। बयान छिट्टै सकिए थुनछेक बहस समेत बुधबार नै हुनेछ। बहस सकिनासाथ उनलाई थुनामा राख्ने कि थुनाबाहिरै रहेर मुद्दा लड्न दिने भन्ने आदेश हुनेछ।

सुप्रिम सहकारी ठगीमा २२ जनालाई प्रतिवादी बनाउँदै गत आइतबार नै जिल्ला अदालत रुपन्देहीमा पूरक अभियोग दर्ता भइसकेको छ। तर अभियोग अदालतमा पेस गर्दा एकजना पनि प्रतिवादी साथमा थिएनन्। पूरक अभियोगमा प्रतिवादी बनाइएका अभियुक्तमध्ये रवि नै अदालतमा उपस्थित हुने पहिलो अभियुक्त हुन्।

पूरक अभियोगमा कुमार रम्तेल, शिवबहादुर गुरुङ, छविलाल जोशी, रवि लामिछाने, लक्ष्मीप्रसाद पौडेल, दिपक लामा, अनन्तबाबु राई, श्रीवल्लभ नेपाल, शिवप्रसाद पौडेल, वीरबहादुर रानाभाट, विशाल तामाङ, रविना रिमाल, भगवती बम्जन, विज्ञान राई, नरेश जिसी, गितेन्द्रबाबु राई, भुपेन्द्र राई, देवेन्द्रबाबु राई, सागर केसी, नवीन अछामी, असरफ अलि सिद्दिकी र हेमन्त अधिकारीलाई प्रतिवादी बनाइएको छ।

जिल्ला सरकारी वकिल कार्यालय रुपन्देहीले अभियोगमा यीमध्ये २० जना फरार रहेको उल्लेख गरेको छ। दुईजना मात्रै फरारको सूचीमा छैनन्। कुमार रम्तेल र शिवबहादुर गुरुङ कास्की कारागारमा रहेको उल्लेख छ।

तर यसअघि नै अनुसन्धानका क्रममा बयान दिन कास्की प्रहरीको हिरासतबाट लगिएका पूर्वगृहमन्त्री लामिछाने र नेपाल प्रहरीका पूर्वप्रहरी नायब महानिरीक्षक डीआईजी छविलाल जोशीलाई पनि फरार जनाइएको छ।

रवि र छवि जिल्ला अदालत कास्कीले धरौटीमा रिहा गर्न आदेश दिएपछि प्रहरी कार्यालयमै कागज गरेर पुस २५ गते रिहा भएका हुन्। तर उनीहरू कास्कीको सूर्यदर्शन सहकारी ठगीको मुद्दामा छुटिजाने भएमा आफूलाई जिम्मा लगाइदिन रुपन्देहीले कास्की प्रहरीलाई पत्राचार गरेको थियो।

अन्य जिल्लाका प्रहरीको पत्राचार अनुसार नै जिल्ला सरकारी वकिल कार्यालयले पनि अभियोगपत्रमा सूर्यदर्शन सहकारी ठगीको मुद्दामा पुर्पक्षमा नगएर छुटी जाने भएमा प्रहरीकै जिम्मा लगाइदिन माग गरेको थियो। सरकारी वकिलको उक्त मागका विषयमा कास्की अदालतले केही पनि बोलेन। अदालतले नबोलेपछि प्रहरीले पनि रविलाई उनकै पत्नी निकिता र छविलाई रास्वपाका कार्यवाहक सभापति डोलप्रसाद अर्यालको जिम्मामा रिहा गरेको थियो।

पोखरामा ६५ लाख धरौटी बुझाएर रिहा भएको दुई दिनपछि लामिछाने जिल्ला अदालत काठमाडौँमा हाजिर भए। काठमाडौँको स्वर्णलक्ष्मी सहकारी ठगीको अभियोगमा अदालतले उनीसँग ६० लाख धरौटी माग गर्‍यो। रवि धरौटीमा रिहा भएको एक सातापछि छवि पनि अदालतमा आफैँ उपस्थित भए। उनलाई पनि अदालतले ५० लाख धरौटी माग गर्‍यो। उनी पनि त्यसैदिन धरौटी बुझाएर रिहा भइसकेका छन्।

रवि अघिअघि र छवि पछिपछि आफूमाथि लागेको अभियोगको सामना गर्दैछन्। प्रहरीले नै जिम्मा लगाएर रिहा गरिएका रवि र छवि बुटवलको सुप्रिम सहकारीको अभियोगमा अझै फरार करार छन्।

अदालतले खोज्ने छ रविसँग १३ करोड हिनामिनाको जवाफ
पूरक अभियोगमा प्रतिवादी बनाइएका २२ जनाविरुद्ध ५५ करोड ५९ लाख ८३ हजार ८४२ रुपैयाँ बिगो कायम गरिएको छ। उनीहरूबाट सहकारी ऐन, २०७४ को दफा १२४ को उपदफा ९१० बमोजिम सहकारी संस्थालाई बिगो भराई पाउन माग गरिएको छ।

मुलुकी फौजदारी कार्यविधि नियमावली, २०७५ को नियम ९२ बमोजिम प्रतिवादीहरूको नाममा रहेको सम्पत्तिको हक हस्तान्तरण गर्न नपाउने गरी रोक्का राख्न पनि आदेश माग गरिएको छ।

हरेक प्रतिवादीको कहाँकहाँ संलग्नता देखिएको छ भन्ने पनि अभियोगमा खुलाइएको छ। रवि लामिछाने यसमध्ये १३ करोड रुपैयाँको हिनामिनामा संलग्न रहेको अभियोग छ। यसमध्ये ४ करोडभन्दा बढी रविको भागमा बिगो कायम हुनेछ।

उनले गोर्खा मिडिया नेटवर्कमा सेयर लिँदा २ करोड रुपैयाँ सुप्रिम सहकारीबाटै भुक्तानी भएको पाइएको छ। सहकारी संस्थाबाट गोर्खा मिडिया नेटवर्क प्रालिमा रवि लामिछानेका नाममा रकम जम्मा भएको सहकारी संस्थाको लेखा हिसाब राख्ने जीसीएस बैंकिङ सफ्टवेयर प्रणाली, डे बुक तथा आन्तरिक भौचर र ऋण सम्बन्धी आन्तरिक पत्र समेतबाट खुलेको अभियोग छ।

लामिछाने समेत सञ्चालक रहेको गोर्खा मिडिया नेटवर्कमा विभिन्न मितिमा गरी कुल १० करोड ९९ लाख ३६ हजार रुपैयाँ लगेर हिनामिना गरेको आरोप छ। उक्त रकम सहकारी संस्थालाई फिर्ता गरेको नदेखिएको अभियोगमा भनिएको छ।

रविले सहकारी संस्थामा रकम तिर्न पर्ने थिएन भनेर बयान दिए पनि उनकै दस्तखतबाट सञ्चालन हुने गोर्खा मिडिया नेटवर्कको ग्लोबल आईएमई बैंकको चेक मार्फत २०७८ पुस २२ गते ४० लाख ९२ हजार रुपैयाँ सहकारीका नाममा जारी गरेको प्रमाण प्रहरीले फेला पारेको थियो।

सहप्रतिवादी कुमार रम्तेलले बयान गर्दा गोर्खा मिडिया नेटवर्कमा रकम लैजाने मानिस र रवि लामिछानेको नाममा रकम लैजाने व्यक्ति एकै हुन् भनी पोल खोलेका छन्।

रविले सहकारी संस्थाबाट रकम जम्मा भएको भौचरमा रकम जम्मा गर्ने व्यक्ति रवि लामिछाने र रोशनी गुरुङ उल्लेख छ।

रोशनीले मूल अभियोग पत्रको बयानमा रवि लामिछानेको नाम राखेको भनी लेखाएको, गोर्खा मिडिया नेटवर्कमा २०७८ वैशाख ५ गते ग्लोबल आईएमईआई बैंकको भौचरमा एक करोड जम्मा भएको बैंक स्टेटमेन्टबाट देखिने उल्लेख छ।

यसअघि प्रहरी र सरकारी वकिलसमक्ष बयान गर्दा आफ्नो संलग्नता इन्कार गरेका रविले बुधबार अदालतमा पनि यी प्रश्नको सामना गर्नुपर्नेछ।