काठमाडौं २३ मंसिर । संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले हवाई र स्थलमार्गबाट आउने पर्यटकले भोग्नु परेका समस्याको समाधान गर्नका लागि आफू लागिपरेको बताउनुभएको छ।

कैलालीको धनगढीमा आयोजित सुदूरपश्चिम प्रदेशको पर्यटन विकास रणनीति बारे सरकार र निजी क्षेत्रको छलफल तथा अन्तरक्रिया कार्यक्रममा बोल्दै मन्त्री पाण्डेले उक्त कुरा बताउनुभएको हो।

मन्त्री पाण्डेले भन्नुभयो, ‘सडक मार्गका पूर्वाधारसमेत सहज बनाउन पर्ने देखिन्छ। प्रत्येक पर्यटकले हवाई र सडक यातायातबाट सास्ती बेहार्नु पर्ने समस्याको अन्त्य हुनुपर्छ।’

सम्बोधनका क्रममा उहाँले हवाई र स्थलमार्गबाट आउने पर्यटकको समस्याको पहिचान गरी त्यसको समाधानका लागि अन्तर मन्त्रालय छलफल भइरहेको बताउनुभयो।

विविधता पूर्ण संस्कृति र प्राकृतिक विविधताका दृष्टिकोणले समेत भरिपूर्ण रहेको स्मरण गर्दै उहाँले सुदूरपश्चिम देवहरूको भूमि रहेकाले यहाँको महत्त्व निकै बढेको समेत बताउनुभयो।

मन्त्री पाण्डेले सुदूरपश्चिम जल, जंगल र जडीबुटी लगायतका पर्यटकीय क्षेत्रका दृष्टिकोणले निकै माथि रहेको समेत प्रष्ट पार्नुभयो।

उहाँले यस क्षेत्रलाई धार्मिक र पर्यटकीय क्षेत्रको रूपमा विकास गर्न सकिने बताउँदै सुदूरपश्चिमलाई कैलाश मानसरोवर जोड्न सके फाइदा पुग्ने बताउनुभयो।

उहाँले धार्मिक,पर्यटकीय दृष्टिकोणले भारतीय पर्यटक भित्र्याउन सकेको अवस्थामा मात्रै ठूलो लाभ लिन सकिने विश्वास व्यक्त गर्नुभयो।साथै मन्त्री पाण्डेले बर्दियाको ठाकुरदारमा आगामी दिनमा हुने विषयगत समितिको बैठकमा सुदुरपश्चिम, कर्णाली र गण्डकी प्रदेशका मुख्यमन्त्रीलाई समेत सहभागी हुन आह्वान गर्नुभयो।