काठमाडौं २१ मंसिर । मानव अधिकार सङ्गठन एमनेष्टी इन्टरनेसनलले इजरायलले प्यालेस्टाइनको गाजा क्षेत्रमा नरसंहार मच्याएको आरोप लगाएको छ । आज नयाँ रिपोर्ट सार्वजनिक गर्दै एमनेष्टीले गाजामा दुईतर्फी युद्ध निकै कम भएको तर इजरायलले एकतर्फी रुपमा गोला बारुद वर्षाएर निर्दोष नागरिकको ज्यान लिइरहेको उल्लेख छ ।

एमनेस्टीले इजरायलको सैन्य अभियान र यसको नीतिहरूको सामूहिक प्रभावलाई हेरेको र इजरायलले गाजामा नरसंहारको लागि कानूनी सीमा पार गरेको निष्कर्ष निकालेको बताएको छ । ‘प्यालेस्टाइनहरू कुपोषण र रोगको कारण व्यापक विनाशको सामना गरिरहेका छन् ।’ रिपोर्टमा उल्लेख छ ।

एकै वर्षमा इजरायलले ४५ हजार जनाभन्दा धेरै प्यालेस्टाइनीको ज्यान लिइसकेको छ । तर इजरायली सेनाले भने एमनेस्टीको नयाँ रिपोर्टमा भएका दाबीहरु पूर्ण रूपमा आधारहीन रहेको जवाफ दिएको छ । इजरायलले अन्तर्राष्ट्रिय कानूनको सम्मान गरेको र गाजामा युद्ध १५ महिना अघि हमासको आक्रमणपछि शुरु भएको इजरायली सेनाको दाबी छ ।