काठमाडौं १८ मंसिर । भियतनाममा संसारकै सबैभन्दा ठूलो बैंक ठगीको मुद्दामा दोषी ठहर भएकी एक जना घरजग्गा व्यापारीले मृत्युदण्डको फैसलाविरुद्ध गरेको पुनरावेदन खारेज भएको छ ।

गएको अप्रिल महिनामा भियतनामको एउटा अदालतले ट्रूङ मी लानले गरेको पुनरावेदन खारेज भएको बीबीसीले जनाएको छ । भियतनाममा कुनै पनि वित्तीय अपराधमा महिलालाई पहिलो पटक मृत्युदण्ड सुनाइएको हो ।

प्रायः गोप्यता राख्ने कम्युनिस्ट अधिकारीहरूले यो मुद्दाबारे धेरै कुरा सार्वजनिक गरेका छन् । यो मुद्दामा दुई हजार सात सय जनासँग बयान लिइएको उल्लेख छ । यो मुद्दामा १० सरकारी अभियोजक र झन्डै दुई सय जना वकिल संलग्न थिए । प्रमाणहरू एक सय चार वटा बाकसमा राखिएका छन् जसको तौल ६ टन रहेको छ ।

ट्रूङ मी लानले आफूमाथि लागेका आरोप अस्वीकार गरेकी थिइन् । उनले साइगन कमर्शिएल बैंक ९एससीबी० मा गोप्य रूपमा कब्जा जमाएको र १० वर्षको अवधिमा नगद र ऋण गरी ४४ अर्ब अमेरिकी डलर लिएको अदालतले ठहर गरेको थियो । त्यसमध्ये उनले २७ अर्ब डलर अपचलन र १२ अर्ब डलर हिनामिना गरेकी अदालतको ठहर छ ।

अब ट्रूङ मी लानले मृत्युदण्डबाट जोगिन निकै सङ्घर्ष गर्नुपर्ने छ । भियतनामको कानूनअनुसार उनले आफूले हिनामिना गरेको रकमको ७५ प्रतिशत फिर्ता गरेमा उनलाई मृत्युदण्डको सट्टा जन्मकैद हुने छ ।