काठमाडौं २३ असोज । प्रधानमन्त्री केपी शर्मा ओलीलाई प्रधानमन्त्री दैवी प्रकोप राहत कोषका लागि आज गैरआवासीय नेपाली संघ ९एनआरएनए० अन्तर्राष्ट्रिय समन्वय परिषद्ले १ लाख रुपैयाँ हस्तान्तरण गरेको छ।

प्रधानमन्त्री निवास, बालुवाटारमा प्रधानमन्त्री ओलीलाई संघका अध्यक्ष डा बद्री केसी नेतृत्वको प्रतिनिधिमण्डलले उक्त रकम हस्तान्तरण गरेको हो।

अध्यक्ष डा केसीले हालैको बाढी, पहिरो र डुबानको खबरले आफूहरू दुःखी भएको बताउँदै कोषमा सहयोगका अतिरिक्त प्रभावित क्षेत्रमा एक करोड रूपैयाँबराबरको राहत उपलब्ध गराउने कार्य भइरहेको जानकारी पनि दिए।

प्रधानमन्त्रीसँग भेटका क्रममा अध्यक्ष डा केसीले एनआरएनए नागरिकता प्राप्त भएपछि आर्थिक र सामाजिक काममा पनि त्यसको प्रयोगमा समस्या रहेको गुनासो गरेका थिए।

प्रधानमन्त्री ओलीले विपद्का समयमा मानवीय सहयोग गरेकामा संघलाई धन्यवाद दिँदै एक पटकको नेपाली सधैँको नेपाली हुने भए पनि विदेशको नागरिकता लिएपछि नेपालमा राजनीतिक अधिकार प्रयोग गर्न नमिल्ने स्पष्ट पारे।

दोहोरो नागरिकता समस्याको समाधानका लागि गम्भीर छलफल आवश्यक पर्ने उनको भनाइ थियो।

प्रधानमन्त्री ओलीले संघको स्थापनापूर्वदेखि नै नेपालको समृद्धिमा गैरआवासीय नेपालीको सहभागिताका लागि आफू लागेको उल्लेख गर्दै कामका लागि विदेश गएकालाई एनआरएनको परिभाषामा नराख्न आग्रह पनि गरे।

उनले संघलाई राजनीतिक आधारमा नभई सबै गैरआवासीय नेपालीको साझा संस्थाका रूपमा अघि बढाउन सुझावसमेत दिए।

यसैबीच, प्रधानमन्त्री केपी शर्मा ओली एनआरएनए दिवसमा प्रमुख अथितिका रूपमा उपस्थित हुने निश्चित भएको संघका उपाध्यक्ष रामशरण सिम्खडाले जानकारी दिए। अक्टोबर २७ ९कात्तिक ११० का दिन संघले एनआरएनए दिवस मनाउँदै छ।

सिम्खडाका अनुसार, गैरआवासीय नेपाली नागरिकता र भूतपूर्व ब्रिटिस गोर्खा सैनिकबारे संघले उठाएका मुद्दा सम्बोधनका लागि सरकार सकारात्मक रहेको प्रधानमन्त्रीले बताएका छन्।