काठमाडौँ, १८ फागुन । प्रतिनिधिसभा र राष्ट्रिय सभाका सांसदले आठ वटा भाषा सपथका लागि रोजेका छन् । संसद सचिवालयमा निवेदन परे अनुसार मैथिली , हिन्दी, बज्जिका, नेवारी, मगर, भोजपुरी, थारु, तामाङ, र उर्दु भाषामा सपथ लिनको लागि सांसदले निवेदन दिएका छन्।

संघीय समाजवादी फोरम नेपालका अध्यक्ष उपेन्द्र यादव र राजपा अध्यक्ष मण्डलका नेता महन्थ ठाकुरले मैथिलीमा सपथ लिने भएका छन् ।

राजपा अध्यक्ष मण्डलकै अर्का नेता राजेन्द्र महतोले भने हिन्दीमा सपथ लिने भन्दै संसद सचिवालयललाई जानकारी दिएका छन् । राजपाकै महिन्द्रराय यादवले मातृभाषा बज्जिकामा सपथ लिँदै छन् ।

नेपालीपछि सबैभन्दा धेरै मैथिली भाषामा सपथ लिन सांसदहरुले सूचना संसद सचिवालयमा दिएका छन् । राष्ट्रिय सभातर्फ मैथिलीमा बृषेशचन्द्र लाल, डा. सुरेन्द्रकुमार यादव, प्रमिला कुमारी, सूर्यनारायण यादव (सुरज)ले सपथ लिँदैछन् । त्यस्तै हिन्दीमा रमेश यादव र बज्जिका भाषामा रामप्रित पासवानले सपथ लिदैँछन् ।

मैथिलीमा उपेन्द्र यादव, उमाशंकर अरगरिया, चन्द्रकान्त चौधरी, दुलारीदेवी खत्वे, सुरेशचन्द्र दास, शरतसिंह भण्डारी, राजकिशोर यादव, महन्थ ठाकुर, रेणुकुमारी यादव, दिलकुमारी, मातृका यादव, इन्दुकुमारी शर्मा र मिनाक्षी झाले सपथ लिँदैछन् ।

हिन्दीमा अनिलकुमार झा, प्रमोद शाह, राजेन्द्र महतो, लक्ष्मणलाल कर्ण, अमृता अग्रहरी, रानी मण्डल, सरिता गिरी र चन्दा चौधरीले सपथ लिँदैछन् । अवधीमा मुअम्मद इस्तियाक राइले सपथ लिँदैछन् ।

त्यस्तै भोजपुरीमा प्रदीप यादव, रामबाबुकुमार यादव, रामसहायप्रसादय यादव, हरिनारायणप्रसाद रौनीयार र अकवाल मियाँले सपथ लिँदैछन् ।

संसद सचिवालयले मातृभाषामा सपथ लिन चाहाने सांसदलाई फागुन १८ गतेसम्म जानकरी गराउन समय दिएको छ । हालसम्म ४० भन्दा बढी सांसदले मातृभाषामा सपथ लिने जानकारी गराएका छन् । सपथको व्यहोरासमेत सम्बन्धित सांसदले अनुवाद गरेर संसद सचिवालयाई दिनुपर्ने हुन्छ ।

प्रतिनिधिसभातर्फ नेवारीमा राजेन्द्र श्रेष्ठले सपथ लिँदैछन् । मगर भाषामा वर्षमान पुन र ओनसरी घर्तीले सपथ लिदैछन् ।

थारु भाषामा गंगा चौधरी सत्गौवा, शान्ता चौधरी र रेशमलाल चौधरीले सपथ लिँदैछन् । त्यस्तै तामाङ भाषामा हितबहादुर तमाङले सपथ लिँदैछन् ।

बज्जिका भाषामा महिन्द्रराय यादवले सपथ लिँदैछन्। उनले भने जेष्ठ सदस्यको हैसियतमा राष्ट्रपति समक्ष सपथ लिनेछन्। यादवको सपथ २० गते दिउँसो १ बजे हुनेछ ।

त्यस्तै, उर्दु भाषामा रोहीनाजले सपथ लिँदैछन् । संसद सचिवालयले आउँदो २० गते ३ बजे राष्ट्रिय सभाका सांसद र ४ बजे प्रतिनिधि सभाका सांसदका लागि सपथ राखेको छ ।