काठमाडौं २८ असार । प्रधानमन्त्री पुष्पकमल दाहाल प्रचण्डले आज विश्वासको मत लिँदै छन्।
अहिले बिहान ११ बजेकाबाट प्रतिनिधि सभा बैठक शुरु भएको छ । बैठकको शुरुमै सांसदहरुले बाढी पहिरोबाट निधन भएकाहरुप्रति चिन्ता व्यक्त गर्दै धारणा राखेका थिए ।
नेकपा एमाले सरकारबाट बाहिरिँदै समर्थन फिर्ता लिएपछि अल्पतमा परेका प्रधानमन्त्री प्रचण्डले पुनः संसद्बाट विश्वासको मत लिन लागेका हुन्।
सरकारमा सहभागी दलले समर्थन फिर्ता लिएको ३० दिनभित्र प्रधानमन्त्रीले विश्वासको मत लिनुपर्ने संवैधानिक व्यवस्था छ।
२७५ सदस्यीय प्रतिनिधि सभामा विश्वास मत पाउन बहुमत १३८ सांसदले पक्षमा मतदान गर्नुपर्छ।
तर प्रधानमन्त्री प्रचण्डका पक्षमा आफ्नो पार्टी माओवादी केन्द्रका ३२, राष्ट्रिय स्वतन्त्र पार्टीका २१ र नेकपा एकीकृत साजवादीका १० गरी ६३ मत मात्रै छ।
नयाँ गठबन्धन बनाएका नेपाली कांग्रेस र नेकपा एमालेले प्रधानमन्त्रीलाई विश्वासको मत नदिन आफ्ना सांसदलाई ह्विप जारी गरिसकेका छन्।
राप्रपा, जनता समाजवादी पार्टी, जनता समाजवादी पार्टी नेपाललगायतले पनि प्रधानमन्त्रीलाई विश्वासको मत नदिने निर्णय गरेका छन्।
प्रधानमन्त्री प्रचण्ड विश्वासको मतमा फेल हुनेबित्तिकै कांग्रेस–एमालेले संविधानको धारा ७६ (२) अनुसार सरकार बन्ने दाबी गरिरहेका छन्। सोअनुसार कांग्रेस(एमाले गठबन्धनले आजै नयाँ सरकारको दाबी पेस गर्ने तयारी गरेका छन्।
तर धारा ७६ को उपधारा २ अनुसारै प्रधानमन्त्री बनेका प्रचण्डले विश्वासको मत नपाए राष्ट्रपतिले फेरि सोही धाराको उपधाराअनुसार सरकार गठन आह्वान गर्न मिल्छ कि मिल्दैन भन्नेमा विवाद छ।
यसैले प्रधानमन्त्रीले भने आफूले विश्वासको मत नपाए सरकार गठनको प्रक्रिया धारा ७६ (३) मा जाने तर्क गरिरहेका छन्।
प्रतिक्रिया दिनुहोस्