काठमाडौं । नेपाल आदिवासी जनजाति पत्रकार महासंघ (फोनिज) युकेले स्थापना गरेको ‘फोनिज युके पत्रकारिता सम्मान दिपीन राई (दिपेन्द्र चाम्लिङ) र पुरस्कार संगीता चेपाङलाई प्रदान गरिएको छ ।

फोनिज युकेको २५ जनवरीमा बसेको बैठकले राईलाई ‘फोनिज युके पत्रकारिता सम्मान–२०२३’र चेपाङलाई ‘फोनिज युके पत्रकारिता पुरस्कार–२०२३’ प्रदान गर्ने निर्णय गरेको थियो ।

काठमाडौंमा आज आयोजित कार्यक्रममा महिला, बालबालिका तथा जेष्ठ नागरिक मन्त्री भगवती चौधरीले सो सम्मान तथा पुरस्कार प्रदान गरे । पुरस्कार र सम्मानको राशी जनही २५–२५ हजार रुपैयाँ रहेको छ ।

कार्यक्रममा फोनिज संघीय अध्यक्ष गजुरधन राईले खादा लगाएर सम्मान गरे भने फोनिज युकेका निवर्तमान अध्यक्ष गोमा रानामगरले नगद हस्तान्तरण गरे ।

दिपीन राई २०४९ साल दैनिक विवेचनादेखि अनवरत पत्रकारितामा सम्लग्न छन् । हाल यलम्बर टाइम्समा सम्पादक–प्रकाशक तथा लोकतन्त्र दैनिकमा कार्यरत छन् ।

त्यस्तै युवा पत्रकार चेपाङ इच्छाकामना एफ एम १०२.४ मेघाहर्ज कुरिनटार चितवनमा कार्यरत छन् ।