एजेन्सी, ३ फागुन । अस्ट्रेलियाका प्रधानमन्त्री माल्कम टर्नबुलले मन्त्री र तिनका कर्मचारीबीच हुने यौन सम्बन्धमा प्रतिबन्ध लगाइने बताएका छन्।

मन्त्रिमण्डलमा रहेका उपप्रधानमन्त्रीको सम्बन्ध एउटी पूर्वकर्मचारीसँग भएको सार्वजनिक भएपछि उनले यस्तो घोषणा गरेका हुन्।

एउटा पत्रकार सम्मेलनमा बोल्दै बार्नबी जोइसको आचरणलाई ुविवेकमा भएको भयङ्कर त्रुटिु भन्दै प्रधानमन्त्री टर्नबुलले उनको निन्दा गरे।
मन्त्री पदको गरिमा तोडिएको छ कि छैन भनेर छानबिन हुँदै गर्दा जोइस सोमवारदेखि बिदामा बस्दै छन्।

जोइस र टर्नबुल दुवैले कुनै पनि स्थापित नियम भने उल्लङ्घन नभएको दाबी गरेका छन्।

जोइस र उनकी मिडिया सल्लाहकार भिकी क्याम्पिअनको यौन प्रकरण सावजनिक भएपछि गत बुधवारदेखि अस्ट्रेलियाको राजनीति तरङ्गित भएको छ।

संसद्‌मा बोल्दै टर्नबुलले आफू संयुक्त राज्य अमेरिकाको भ्रमणमा अर्को हप्ता जाँदा जोइसलाई कार्यवाहक नदिने बताएका छन्।

बीबीसी