काठमाडौं १ माघ । राष्ट्रपति रामचन्द्र पौडेलले संविधान कार्यान्वयनका लागि आवश्यक कानुन तत्काल निर्माण गर्न राजनीतिक दलहरूसँग आग्रह गरेका छन् । राष्ट्रपति पौडेलले संविधान कार्यान्वयनमा भएको कमीले जनतामा निराशा छाएको उल्लेख गर्दै त्यसलाई आशामा परिणत हुनेगरी राजनीतिक दलहरूले आवश्यक काननहरूको निर्माण गरेर संविधान कार्यान्वयनमा ध्यान दिनुपर्ने बताएका हुन् ।

संघीय संसद्मा प्रतिनिधित्व गर्ने सबै राजनीतिक दलका शीर्ष नेताहरूलाई माघी पर्वको अवसर पारेर सोमबार राष्ट्रपति भवन शितल निवासमा बोलाएर राष्ट्रपति पौडेलले नेपाली जनताको चाहना र भावनाअनुसार अघि बढ्नका लागि संविधान कार्यान्वयन गर्दै संघीय लोकतान्त्रिक गणतन्त्र र समावेशी लोकतन्त्रलाई साकार पार्ने अठोट सबै राजनीतिक दलहरूले गर्नुपर्ने बताएका हुन् ।

‘यत्तिको संविधान दक्षिण एसियामा, सार्क मुलुकहरूमा कमै होला भनेर सबैले सम्मान गरेका छन्, प्रशंशा गरेका छन् । अब यसलाई कार्यान्वयनमा ल्याउने कुराको आवश्यक्ता छ । यो संविधानले पीछडिएका वर्गलाई, उपेक्षित वर्गलाई जो अधिकार दिएको छ । त्यो सार्थक हुनुपर्‍यो,’ राष्ट्रतिको आग्रह थियो, ‘हामीले व्यवहारमा उतार्नका लागि कानुन बनाउनुपर्नेछ । त्यसैले विशेष गरी ध्यान दिनुपर्ने विषय संविधानले दिएको अधिकारलाई कानुनद्वारा व्यवस्थित गर्नुपर्नेछ । ती कानुनहरूको निर्माण छिटो भन्दा छिटो हुन जरुरी छ भन्ने मलाई लागिरहेको छ । मेरो तपाईहरू सबैलाई अनुरोध र आग्रह के छ भने संविधान कार्यान्वयनमा जाऔँ ।’

राष्ट्रपति पौडेलले नेपालमा रहेका विदेशी राजदूतहरू तथा प्रतिनिधिहरूले नेपालको संविधानको प्रसंसा गर्ने गरेको पनि बताएका थिए । ‘मैले यहाँ आएपछि जति पनि विदेशी प्रतिनिधिहरू, पाहुनाहरू, राजदुतहरू अथवा विभिन्न विदेशी निकायका प्रतिनिधिहरूसँग मैले भेटेको छु । उनीहरूले नेपालको अहिलेको संविधानको मुक्तकण्ठले स्वागत गर्ने गरेका छन्,’ उनले भने । संविधानले महिला, दलित, जनजाति, अल्पसंख्यक, पीछडिएका दुर्गमका जनतालाई अधिकार दिएको भन्दै सबैले प्रसंसा गरेको उनको भनाइ थियो ।

जनताले विकासको अपेक्षा गरेको र त्यसमा जनप्रतिनिधिले उचित भूमिका निर्वाह गर्नुपर्ने राष्ट्रपतिको भनाइ थियो । जनताले संविधानपछि गरेको आशालाई निराशामा परिणत हुन दिन नहुने उनले आग्रह गरेका थिए । ‘जनताले अब जे पाइन्छ भन्ने आशा गरेका छन् त्यो आशालाई निराशामा परिणत नगरौँ । देशमा निराशाका कुराहरू आएका छन् । यो संविधान कार्यान्वयनको कमीले हो,’ राष्ट्रपतिले भनेका थिए, ‘अब पछाडि फर्कन कोही नेपाली जनता चाहँदैनन्, नेपाली जनताको चाहना र भावना मैले पनि बुझेको छु । विदेशबाट आएकाहरूको मात्र होइन कि देश भित्रका जनताको पनि अगाडि बढ्ने चाहना छ । अगाडि बढ्ने हो, संविधान कार्यान्वयन गरेर देशलाई विकास गर्ने हो । देशलाई संघीय लोकतान्त्रिक गणतन्त्र र समावेशी लोकतन्त्र साकार पार्ने हो ।’

त्यस अवसरमा राष्ट्रपति पौडेलले माघीलाई नेपालको मौलिक पर्वको रुपमा चित्रण गर्दै सबैमा शुभकामना समेत व्यक्त गरेका थिए ।

समारोहमा उपराष्ट्रपति रामसहायप्रसाद यादव, प्रतिनिधिसभाका सभामुख देवराज घिमिरे, राष्ट्रिय सभा अध्यक्ष गणेशप्रसाद तिमिल्सिना, नेपाली कांग्रेसका सभापति एवं पूर्वप्रधानमन्त्री शेरबहादुर देउवा, नेकपा (एकीकृत समाजवादी)का अध्यक्ष एवं पूर्वप्रधानमन्त्री माधवकुमार नेपाल, राष्ट्रिय स्वतन्त्र पार्टीका सभापति रवि लामिछाने, जनता समाजवादी पार्टी, नेपालका अध्यक्ष उपेन्द्र यादव, लोकतान्त्रिक समाजवादी पार्टीका अध्यक्ष महन्थ ठाकुर, राष्ट्रिय प्रजातन्त्र पार्टीका पूर्वअध्यक्ष पशुपतिशमशेर जबरालगयतका नेताहरूको उपस्थिति रहेको थियो ।