काठमाडौं, २ फागुन । प्रदेश नम्बर ४ को सभामुखमा माओवादी केन्द्रका सांसद नेत्रनाथ अधिकारी निर्विरोध भएका छन् ।
मनोनयनका लागि बुधबार बिहान साढे १० देखि साढे १२ बजेभित्र मनोनयन दर्ता गर्ने समय तोकिएको थियो । अन्य दलले उमेद्वारी नदिए पछि अधिकारी निर्विरोध भएका हुन् ।
अधिकारीको प्रस्तावकमा माओवादी सांसद हरिबहादुर चुमान र समर्थकमा एमाले सांसद किरण गुरुङ रहेका छन् ।
कांग्रेसले जित हासिल नगर्ने भएकाले सभामुखमा मनोनयन दर्ता नराएको सांसद कृष्णचन्द्र नेपालीले जानकारी दिए ।
प्रदेश नम्बर ४ मा वाम गठबन्धनबीच मुख्यमन्त्री एमाले र सभामुख माओवादीलाई दिने सहमति भएको थियो । माओवादीको संसदीय बैठकले अधिकारीलाई सभामुख बनाउने निर्णय गरेको थियो ।
बिहीबार नै प्रक्रियाअनुसार सभामुखले उपसभामुखको निर्वाचनको मिति घोषणा गर्नेछन् ।
सभामुख र उपसभामुख फरक पार्टी र फरक लैंगिक हुनुपर्ने संविधानले व्यवस्था गरेको छ । माओवादीले पुरुष सभामुख बनाएपछि अब उपसभामुख एमालेबाट महिलाले अवसर पाउने छन् ।
मुख्यमन्त्री र सभामुखको सपथ ग्रहण एकैसाथ शुक्रबार बिहान साढे ९ बजे गरिने कार्यक्रम छ।
प्रतिक्रिया दिनुहोस्