काठमाडौं, ८ पौष । सञ्चार तथा सूचना प्रविधिमन्त्री रेखा शर्माले सुशासन र आर्थिक समृद्धिको प्रयास नै सरकारको प्राथमिकतामा भएको बताएकी छन् । उनले शासन प्रणालीको विषयमा उठेका सवालबारे नकारात्मक धारणा भन्दा पनि सकारात्मक हुनुपर्ने बताइन् ।

विराटनगरमा प्रेस संगठन मोरङले आयोजना गरेको पत्रकार सम्मेलनमा बोल्दै शर्माले गणतन्त्र आएपछि विकासले गति लिएको दाबी गरिन् ।

यो व्यवस्थामा जे गर्दा पनि छुट हुन्छ भन्ने धारणा गलत हो । यही व्यवस्थामा जनाधिकार रक्षा हुन्छ । गणतन्त्र जनताको व्यवस्था हो, उनले भनिन् ।

सुशासनका सवालमा नक्कली भुटानी शरणार्थी प्रकरण, सुन तस्करीका घटना, मिटर ब्याजका समस्याजस्ता विषयको छानबिन गर्न सरकारले वातावरण बनाएको उनको भनाइ छ ।

ठूलालाई कानुन लाग्दैन वा छानबिन हुँदैन भन्ने बुझाइमा परिवर्तन ल्याउन सरकारले गरेका काम सहयोगी भएको बताइन् ।

सरकारको एक वर्ष पूरा गर्न लागेको भन्दै भएका काम, प्रगति र समस्या प्रधानमन्त्रीले देशवासीलाई जानकारी गराउने उनले बताइन् । ूसमस्या छैनन् भन्ने होइन तर राम्रा काम भइरहेका छन्, उनले भनिन् ।

उनले अब लक्ष्य र समय निर्धारण गरेकामा गर्दै सरकार गतिशील हुने बताइन् ।‌ सरकारले अझ सफल काम गर्ने र जन विश्वास कायम गर्ने दाबी गरिन् ।‌

मन्त्री शर्माले मध्यपहाडी लोकमार्गमा टेलिकमको अप्टिकल फाइबर बिछ्याउने कामबारे समेत आजै जानकारी लिएकी थिइन् ।