काठमाडौं, २२ मंसिर । परराष्ट्रमन्त्री एनपी साउदले युक्रेनी सेनाको कब्जामा रहेका दुईजना नेपालीलाई छुटाउने प्रयास भइरहेको बताएका छन् । संसदीय सुनुवाइ समितिको शुक्रबार बसेको बैठकमा परराष्ट्रमन्त्री साउदले उक्त जानकारी दिएका हुन् ।

“युक्रेनमा दुईजना युद्ध बन्दी रहेको कुरा छ । दिल्लीस्थित दूतावबासबाट काम गरिरहेका छौँ । आवश्यक समन्वय गरेर रिहाइका लागि काम भइरहेको कुरा जानकारी गराउँछु,” उनले भने ।

उनका अनुसार रुस सरकारले अहिले नेपाल सरकारसँग संवाद गरेको छ । नेपालले रुसलाई आफ्नो सेनामा नेपाली नागरिकलाई भर्ती नगर्न र भर्ती भएकालाई नेपाल फर्काउन आग्रह गरेको छ ।

विपिन जोशीको प्रसंगमा मन्त्री साउदले आफूले समितिको बैठकमा आउनुअघि इजरायलमा टेलिफोन गरी पछिल्लो अवस्थाबारे बुझेको जानकारी दिए ।

“मैले आफ्नो सरोकार राखेको छु । भोलि दोहा फोरमममा भाग लिन कतार जाँदै छु । त्यहाँ पनि हमाससँग सहजीकरण गरिरहेकाहरूसँग संवाद गर्ने छु र जोशीको विषयमा कुरा गर्ने छु,” उनले भने ।