काठमाडौं, २२ असोज ।  नेकपा एमालेका सांसद रघुजी पन्तले द्वन्द्वग्रस्त इजरायलबाट फिर्ता हुन चाहने नेपालीलाई विमान नै पठाएर भए पनि सरकारले यथाशीघ्र स्वदेश फर्काउनुपर्ने बताएका छन् ।

सुरक्षित रूपमा नेपालीलाई फर्काउनुपर्ने आइतबार आफूले सञ्चारमाध्यमसित बताए पनि सामाजिक सञ्जालमा बंग्याएर प्रचार गरिएको उनको भनाइ छ । कोरोनाका बेलामा तत्कालीन सरकारले नागरिकको उद्धार गरेजस्तै अहिले पनि गरिनुपर्नेमा आफूले जोड दिएको उनले बताए ।

“मैले हिजो आइतबार बोलेका कुरालाई बंग्याएर प्रचार गरियो । सरकारले त्यहाँ रहेका नेपालीहरूको उद्धारको लागि नेपाल एयरलायन्सको विमान पठाएरै भए पनि तुरुन्तै नेपाल फर्काउनुपर्छ,” उनले बाह्रखरीसँग भने, “कूटनीतिक प्रयासलाई अघि बढाएर फर्कन चाहने नेपालीहरूलाई अविलम्ब फर्काउनुपर्छ र द्वन्द्वग्रस्त क्षेत्रमा बस्न चाहनेहरूले पनि बस्न पाऊन् भन्नेमा ध्यान दिनुपर्छ ।”

उनले इजरायलमा नेपालीको मृत्युको घटनाप्रति दुःख व्यक्त गरे । “इजरायलमा जे घटना घटेको छ, यो दुःखद घटना हो । प्यालेस्टाइनी र इजरायलको पहिलेदेखि नै द्वन्द्व भए पनि सुरक्षा व्यवस्था राम्रो थियो,” उनले भने, “त्यसैले नेपाली गएका हुन् । अप्रत्याशित द्वन्द्वप्रति गहिरो दुःख व्यक्त गर्दछु ।”

मृत्यु भएकाको शव स्वदेश ल्याउनुपर्ने र सरकारले क्षतिपूर्तिको व्यवस्था गर्नुपर्ने उनले बताए । “ज–जसको मृत्यु भएको छ, शवलाई स्वदेशमा ल्याइदिनुपर्छ । उनीहरूको लागि नेपाल सरकारले क्षतिपूर्ति दिनुपर्छ । र, इजरायल सरकारसँग पनि कूटनीतिक माध्यमबाट कुरा गर्नुपर्छ ।”

इजरायलमा प्यालेस्टाइनी लडाकु समूह हमासले गरेको आक्रमणमा परी १० नेपाली विद्यार्थीको मृत्यु भएको पुष्टि भइसकेको छ ।