काठमाडौं, १९ माघ । अमेरिकी विदेशमन्त्री रेक्स टिलर्सनले ल्याटिन अमेरिकामा चीन र रूसको बढ्दो उपस्थितिले खतराको संकेत गरिरहेको बताए ।

ल्याटिन अमेरिकाको पहिलो भ्रमणमा निस्कनुअघि टेक्ससमा बोल्दै टिलर्सनले लगानीमा चिनियाँ मोडलले देशको जनशक्ति बाहिर गएको र त्यसले केवल चिनियाँ जनतालाई मात्रै फाइदा पुगेको बताएका हुन् ।

उनले ल्याटिन अमेरिकालाई नयाँ साम्राज्यवादी शक्ति नचाहिएको पनि बताए । टिलर्सनले अमेरिकाले भेनेजुएला र क्यूबामा प्रजातन्त्र पुर्नस्थापित गर्न र त्यहाँ स्वतन्त्र र निस्पक्ष चुनाव गराउनका लागि दबाब दिइरहने पनि बताए ।

ल्याटिन अमेरिकाको भ्रमणमा निस्कनुअघि टेक्सस विश्वविद्यालयमा आफ्नो विदेश नीतिबारे भाषण दिँदै विदेशमन्त्री टिलर्सनले यस्तो बताएका हुन् । उनले ल्याटिन अमेरिकालाई रूस वा चीनसंग काम गर्न भन्दा अमेरिकासंग गर्न पनि आह्वान गरे ।

चीन र रूसले ल्याटिन अमेरिकामा आफ्नो उपस्थिति दह्रो बनाउँदै लगेको उनले बताए । बेइजिङले गर्दै आएको आर्थिक अभ्यास निष्पक्ष नभएको उनले बताए । टिलर्सनले रूसले निरंकुश शासन भएका देशमा हतियारहरू बेचेको आरोप लगोउँदै उसको बढ्दो उपस्थिति खतराको सूचक भएको बताए ।

भाषणकै क्रममा उनले ट्रम्प प्रशासनले भेनेज्वेलामा सत्ता परिवर्तनका लागि कुनै पैरवी नगरेको पनि बताए । उनले भेनेजुएलाका राष्ट्रपति निकोलस मडुरोले संविधानमा रहेर काम गरून् भन्ने मात्रै अमेरिकाले चाहेको बताए ।