काठमाडौँ, २ चैत । आइसिसी विश्वकप क्रिकेट लिग–२ अन्तर्गत आज घरेलु टोली नेपालले अन्तिम खेल युएईसँग खेल्दै छ ।

कीर्तिपुरस्थित त्रिभुवन विश्वविद्यालयको खेल मैदानमा बिहान साढे ९ बजेदेखि सुरू हुने छ । घरेलु टोली नेपालले आज युएईलाई पराजित गर्न सके जुन–जुलाईमा जिम्बाब्वेमा हुने विश्वकप छनोटमा सोझै खेल्न पाउने छ ।

यदि पराजित भएमा यसै महिना अन्तिममा नामिबियामा हुने क्वालिफायर प्लेअफ खेल्नुपर्ने हुन्छ । वर्षा वा कुनै कारण खेल नतिजा नआए वा अंक बाँड्नु परेमा नेपालले सोझै विश्वकप छनोट खेल्ने अवसर गुमाउने छ ।

नेपालले आफ्नो उच्च लय, मनोबल, घरेलु मैदान र दर्शकको भरपूर्ण फाइदा उठाउँदै युएईलाई हराउँदै सोझै जिम्बाब्वेको टिकट काट्न चाहन्छ ।

यसअघिको खेलमा नेपालले युएईलाई ७१ रनमा अलआउट गरेको थियो । जितको लागि २४९ रनको लक्ष्य पछ्याएको युएई २२.५ ओभरमा ७१ रन बनाउँदा अलआउट भएको थियो ।

गएको खेलमा घरेलु मैदानमा हाबी बनेको नेपालले युएईलाई कम स्कोरमा रोक्न ललित राजवंशी एक्लैले पाँच विकेट झारेका थिए भने सन्दीप लामिछानेले २ विकेट लिन सफल भएका थिए । सोमपाल कामी, दिपेन्द्रसिंह ऐरि र गुलसन झाले एक एक विकेट लिएर युएईलाई अलआउट गरेको थियो ।

घरेलु मैदानमा एक दिवसीय त्रिकोणात्मक सिरिजमा युएईमाथि सानदार जित निकालेपछि नेपालले आगामी ४ वर्षका लागि एक दिवसीय मान्यता जोगाई सकेको छ ।

लिग २ मा दोस्रो पटक युएईलाई हराएर शीर्ष ५ मा रहँदै एकदिवसीय मान्यता जोगाएको तीन दिनपछि नेपाल आज पुनः युएईसँग भिड्न लागेको हो ।