काठमाडौँ, २८ फागुन । आइसिसी विश्वकप क्रिकेट लिग–२ त्रिकोणात्मक एकदिवसीय सिरिजअन्तर्गत आज नेपालले युनाइटेड अरब इमिरेट्स (युएई)सँग प्रतिस्पर्धा गर्दै छ ।

त्रिभुवन विश्वविद्यालयको खेल मैदान, कीर्तिपुरमा विहान ९ः३० बजेदेखि सुरु हुने खेलमा नेपालले युएसँगै प्रतिस्पर्धा गर्न लागेको हो ।

घरेलु टोली नेपाल आफ्नो उच्च लयलाई निरन्तरता दिँदै युएईलाई हराउँदै आगाम ४ वर्षका लागि एकदिवसीय मान्यता पक्का गर्न चाहन्छ । नेपाल ३३ खेलमा १६ मा जित र १५ मा हरसहित ३४ अंकका साथ पाँचौँ स्थानमा छ । अमेरिका ३६ खेलमा १६ जित र १७ हारसहित ३५ अंकका साथ चौथो स्थानमा छ ।

नेपालले यदि युएईलाई हराउँदा ३६ अंकका साथ चौथो स्थानमा उक्लिने छ । बाँकी दुवै खेलमा पराजित भए पनि नेपाल शीर्ष पाँचमा रहँदै सोझै एकदिवसीय मान्यता बचाउने छ । त्यसैले नेपालको लक्ष्य युएईलाई हराउँदै दुई खेल अगावै एकदिवसीय मान्यता पक्का गर्ने हुने छ ।

यता युएई ३३ खेलमा १४ मा जित र १६ मा हरसहित ३१ अंकका साथ छैटौँ स्थानमा छ । युएईलाई शीर्ष पाँचमा रहँदै एकदिवसीय मान्यता जोगाउन बाँकी तीनै खेल जित्नुपर्ने हुन्छ । नेपालसँग पराजित भएमा एकदिवसीय मान्यता सोझै प्राप्त गर्ने अवसर निकै कठिन बन्ने छ । नेपालसँग पराजित हुँदा एकदिवसीय मान्यता बचाउन युएईले बाँकी दुई खेलमा फराकिलो जित हात पार्नुपर्ने हुन्छ ।

यता नेपालले पछिल्ला ९ मध्ये ८ खेलमा जित हात पारेको छ । पछिल्ला ५ खेल घरेलु मैदानमा नेपाल पराजित भएको छैन । उता युएईले पछिल्ला १० खेलमा २ मा मात्रै जित हात पारेको छ । नेपाललाई सोझै विश्वकप छनोट खेल्न बाँकी तीनै खेल जित्नुपर्ने हुन्छ । युएई भने शीर्ष तीन दौडबाट बाहिरिएको छ ।