काठमाडौँ, २६ फागुन । नेपाल नागरिक उड्डयन प्राधिकरण (क्यान)ले जहाजको इन्जिन सुरक्षा जाँच नसकिएसम्म उडान नगर्न श्री एयरलाइन्सलाई निर्देशन दिएको छ ।

आजदेखि श्री एयरलाइन्सका जहाजले कुनै पनि उडान गर्न पाउने छैनन् । जहाजको इन्जिनका सुरक्षा जाँच र उड्न योग्य भए/नभएको परीक्षण गरेपछि मात्रै उडानका लागि अनुमति दिने तयारी प्राधिकरणको छ ।

केही दिनभित्र जहाजको इन्जिनको सुरक्षा जाँच सकिने छ । त्यसपछि जहाज उडान योग्य भएमा श्री एयरलाइन्सका जहाजले उडान भर्ने अनुमति पाउने छन् ।

बिहीबार ७८ जना यात्रु बोकेर काठमाडौँबाट भैरहवा उडान भरेको उडान नम्बर ८२१ को जहाजको एक इन्जिनमा आगो लागेको संकेत ककपिटमा देखिएपछि जहाजलाई पुनः त्रिभुवन अन्तर्राष्ट्रिय विमानस्थलमै फर्काएर सुरक्षित अवतरण गरिएको थियो । उक्त विमान काठमाडौँमा अवतरण गराइएपछि प्राविधिकहरूको निगरानीमा राखिएको थियो भने त्यसलाई जाँच गर्ने श्री एयरलाइन्सका दुई प्राविधिकलाई प्राधिकरणले दिउँसै निलम्बन गरेको थियो ।

बिहीबार बिहान काठमाडौँबाट उडेको केहीबेरमै इन्जिनमा फायर वार्निङ (आगोको संकेत) देखिएपछि चालक दलले विमानको दायाँ इन्जिन बन्द गरेर एउटा इन्जिनकै भरमा आपतकालीन अवतरण गराएका थिए । एसएचए–८२१ उडान नम्बरको विमान काठमाडौँबाट ९ः३८ मा भैरहवाका लागि उडेको थियो । उपत्यका छाडेर धार्के आसपासको आकाशमा पुगेलगत्तै दायाँ इन्जिनमा आगोको संकेत देखिएपछि ९ः५५ मा काठमाडौँ अवरतण गराइएको थियो ।

श्री एयरलाइन्सका ४ वटा सिआरजे र ४ वटा ड्यास क्यु–४०० गरी ८ वटा जहाज छन् । यसले काठमाडौँसहित देशभरका ९ वटा सुगम विमानस्थलबाट सेवा प्रदान गर्दै आइरहेको छ ।