काठमाडौं । सरकारले गुण एयरको जहाज ग्राउण्डेड गरेको छ । नेपाल नागरिक उडड्यन प्राधिकरण (क्यान) ले गुण एयरको सम्पूर्ण उडान ग्राउण्डेड गरेको हो ।

प्राधिकरणका प्रवक्ता जगन्नाथ निरौलाले हवाई सुरक्षा विभागले यात्रु सेवाको विश्वसनीयतामा प्रश्‍न उठाएपछि तत्कालका लागि उडानमा रोक लगाएको बताए। प्राधिकरणले सोमबार कम्पनीलाई तत्काल उडान नगर्न पत्राचार गरेको उनले जानकारी दिए।

‘कम्पनीको आर्थिक अवस्था कमजोर हुनका साथै कर्मचारी र विभिन्न क्षेत्रको बक्यौता रहेको देखिन्छ। यस्तो अवस्थामा कम्पनीको उडान सुरक्षा नै प्रभावित हुने देखियो ।

‘हामीलाई केही समयअघि देखि कर्मचारीले गुनासो गर्दै आएका थिए, गुण एयरका सञ्चालकसँग कुरा भएपछि नियमित तबल दिएको पाइएको थियो, उहाँहरुले पुनः सोही गल्ती गरेपछि हामीले उडान रोक्यौँ’, स्रोतले भन्यो, ‘नियमित रुपमा कम्पनीले तबल नदिएपछि हवाई सुरक्षामा असर पर्ने देख्दै अनिश्चित कालका लागि उडान ग्राउण्डेड गरियो ।’

क्यानले जहाज ग्राउण्डेड गरेतापनि गुण एयरले भने जहाजमा प्राविधिक समस्या आएको र पाइटल तालिममा रहेका कारण केही समय उडान बन्द गरिएको जनाउँदै आएको छ ।

फागुन १ गतेदेखि गुण एयरका जहाज ग्राउण्डेड भएका हुन ।

२०७८ को असोजदेखि गुण एयरले नियमित उडान गर्दै आएको छ । सिम्रिक एयरलाइन्सको नामबाट उडान सञ्चालन गर्दै आएकोमा २०७८ को असोजदेखि गुण एयरको नामबाट उडान सुरु भएको थियो ।

गुण एयरले काठमाडौं–पोखरा, भरतपुर, भैरहवा, सिमरामा दैनिक उडान गर्दै आएको छ ।गुणसँग यती एयरसँग किनेको पाँचवटा जेट स्ट्रीम र पुरानो श्रीम्रिक एयरलाइन्ससँग रहेको दुईवटा १८ सिट क्षमताको जहाज गरी सातवटा जहाज छन् ।