काठमाडौं, ७ माघ । अफगानिस्तानका अधिकारीहरूले राजधानी काबुलस्थित इन्टरकन्टिनेन्टल होटलमा कम्तीमा चारजना बन्दुकधारीले हमला गरेको बताएका छन् ।

विशेष फौजले चारमध्ये दुईजनाको हत्या गरेको र अन्य हमलाकारीसम्म पनि पुग्ने प्रयास गरिरहेको आन्तरिक मामिलासम्बन्धी मन्त्रीका प्रवक्ताले बताएका छन् । बन्दुकधारीहरू शनिबार राति होटलमा प्रवेश गरेर होटलका पाहुना र कर्मचारीमाथि गोलि चलाएका थिए र ग्रिनेड विस्फोट गराएका थिए ।

अधिकारीहरूले ती बन्दुकधारीको आक्रमणमा परी पाचजना घाइते भएको बताएका छन् । पाच तल्ले भवनमा स्थानीय समय अनुसार राति ९ बजेतिर हमला शुरू भएको बताइएको छ ।

बन्दुकधारीहरूले होटलमा प्रवेश गर्नका लागि पहिला होटलका सुरक्षागार्डमाथि गोली चलाएका विवरणहरू आएका छन् । सुरक्षा फौज आइपुग्नु अघि ती बन्दुकधारीहरूले होटलका कर्मचारीहरू र पाहुनामाथि गोली हान्न थालेका थिए ।

सुरक्षा फौज आइपुगेपछि उनीहरूले शुरुमा होटलको भुइतल्ला खाली गरे तर हमलाकारीहरू अझै होटलको माथिल्लो तल्लामा रहेको आन्तरिक मामिला सम्बन्धी मन्त्रीका प्रवक्ता नसरत रहिमीले बीबीसीलाई बताए ।

होटलमा प्रान्तीय अधिकारीहरूको सूचना प्रविधिसम्बन्धी सम्मेलनको आयोजना भएको खबरहरू आएका छन् ।

काबुलस्थित अमेरिकी दूतावासले सहरका होटलहरूको सुरक्षाबारे सचेत रहन भनेको केही दिनमै होटलमा यस्तो हमला भएको हो । यो होटलमा सन् २०११ मा तालिबानले पनि हमला गरेको थियो । हमलामा २१ जनाको ज्यान गएको थियो ।