काठमाडौँ, १९ चैत । नेकपा माओवादी केन्द्रले स्थानीय निर्वाचन लक्षित तेश्रो परिपत्र जारी गरेको छ । शुक्रबार सो पार्टीले तेश्रो विशेष परिपत्र जारी गरेको हो । आन्तरिक परिपत्रमा विशेष परिस्थितिबाहेक पहिले विजयी उमेदवारलाई नदाहोर्याउन निर्देशन दिइएको छ । बिहीबार सम्पन्न सत्तारुढ गठबन्धन दलको बैठकपछि पार्टी अध्यक्ष प्रचण्डले विशेष परिपत्र जारी गर्नुभएको हो । परिपत्रमा उम्मेदवार देश, जनता, पार्टी र क्रान्तिप्रति इमान्दार र निष्ठावान हुनुपर्ने, स्वच्छ छवि भएको हुनुपर्ने मापदण्ड तोकिएको छ ।

परिपत्रमा निर्वाचनमा उम्मेदवार चयन गर्दा अपनाउनुपर्ने मापदण्ड स्पष्ट रुपमा उल्लेख गर्नुका साथै गठबन्धन दलहरुबीचमात्रै निर्वाचनमा तालमेल गर्न पाईने निर्णय पनि प्रेसित गरिएको छ भने समावेशी समानुपातिक प्रतिनिधित्वलाई लागू गर्न निर्देशन पनि दिइएको छ ।

यस्तो छ उम्मेदवार छनौटको मापदण्ड :
१) विशेष परिस्थितिबाहेक सामान्यतया विगतका जनप्रतिनिधिलाई नदाहोर्याउने
२) देश जनता, पार्टी र क्रान्तिप्रति निष्ठावान रहेको
३) स्वच्छ छवि भएको
४) विजयको सम्भावना भएको लोकप्रिय व्यक्ति छनौटमा ध्यान दिने
५) पार्टी अनुशासनप्रति निष्ठावान हुनुपर्ने
६) समानुपातिक समावेशी प्रतिनिधित्वको आधारलाई विशेष ध्यान दिने