काठमाडौँ, २५ फागुन । नेकपा एकीकृत समाजवादीका सम्मानित नेता झलनाथ खनालले अमेरिकी सहयोगसम्बन्धी परियोजना एमसीसीमा नेपालले गरेको व्याख्यात्मक घोषणालाई सम्झौताको अंग बनाउनुपर्ने बताउनुभएको छ ।

बुधबार काठमाडौंमा जारी केन्द्रीय कमिटीको बैठकमा बोल्नै उहाँले भन्नुभयो, ‘हामीले एकतर्फी व्याख्यात्मक घोषणा भनेर जे गरिएको छ, त्यसलाई उपलब्धिपूर्ण बनाउनुपर्छ । यसलाई सम्झौताको अंग बनाउनुपर्छ ।’ यही फागुन १५ गते प्रतिनिधिसभाले १२ बुँदे व्याख्यात्मक घोषणा गर्दै एमसीसी सम्झौता अनुमोदन गरेको थियो । तर, उक्त घोषणालाई अमेरिकाले स्वीकार वा अस्वीकार गरेको केही भनेको छैन् । यही बेला नेता खनालले सम्झौताको अंग बनाउनुपर्ने बताउनुभएको हो । ‘जस्ताको तस्तै कार्यान्वयन भए चीन विरोधी हुन्छ’ नेता खनालले नेपालले गरेको व्याख्यात्मक घोषणालाई सम्झौताको अंग नबनाई जस्ताको तस्तै कार्यान्वयनमा लगिए एमसीसी कम्युनिस्ट र चीन विरोधी हुने टिप्पणी गर्नुभयो ।

‘एमसीसी अब कसरी कार्यान्वयन हुन्छ । यसले व्याख्यात्मक घोषणाको अर्थलाई प्रष्ट्याउँछ’ उहाँले भन्नुभयाे, ‘अहिले कै शर्तमा कार्यान्वयन भयो भने यो कम्युनिस्ट र चीन विरोधी हुन्छ ।’ व्याख्यात्मक घोषणलाई नमान्दा एमसीसी एकलौटी सम्झौताजस्तो हुने र नेपालको भन्दा अमिरिकी हितलाई माथि राखिएको हुन जाने खनाल बताउँनुहुन्छ। साथै व्याख्यात्मक घोषणालाई मान्दा एमसीसीको नाममा विवाद गर्ने कुरा अब नरहेको उहाँले बताउनुभयाे । ‘एमसीसीमै केही कुरा भए पनि चुनावसम्म स्थगन गरौं’ खनालको प्रस्ताव छ ।