काठमाडौं, ११ साउन ।  काठमाडौं नेपाली काँग्रेसका वरिष्ठ नेता रामचन्द्र पौडेलले आफूनिकट केन्द्रीय सदस्यको बैठक बोलाउनुभएको छ । महाधिवेशनबारे छलफल गर्न नेता पौडेलले शुक्रबार दिउँसो बैठक बोलाउनुभएको हो । ‘वरिष्ठ नेताज्यूले आज दिउँसो छलफलका लागि बोलाउनुभएको छ,’ काँग्रेस केन्द्रीय सदस्य जीवन परियारले भन्नुभयो ‘महाधिवेशनकै बारेमा छलफल हुन्छ ।’ काँग्रेसमा महाधिवेशन नजिकिएसँगै नेतृत्वका लागि दौडधुप सुरु भएको छ । संस्थापन इतर समूहमा नेतृत्वका लागि आकांक्षीको संख्या धेरै छ । १४औं महाधिवेशनमा फेरि सभापतिमा उम्मेदवारी दिने पौडेलको आकांक्षा छ। नेता पौडेलले सामूहिक छलफल गरेर अगाडि बढ्ने बताउनुभएको छ । पौडेलले यसअघि बिहीबारका लागि बैठक बोलाउनुभको थियो तर विपक्षी गठबन्धनका शीर्ष नेताहरुले पत्रकारसँग अन्तर्क्रिया कार्यक्रम गर्ने समयसँग जुधेपछि स्थगित भएको हो । काँग्रेस सभापति शेरबहादुर देउवाले नेतृत्वमा दोहोरिन तयारी तीव्र पार्नुभएको छ । उहाँले पहिलो चरणमा आफूनिकट केन्द्रीय सदस्यसँगको छलफल सक्नुभएको छ । त्यस्तै उपसभापति विमलेन्द्र निधिले पनि सभापतिमा दाबी गर्नुभएको छ । उहाँले सभापतिका आकांक्षीसँगको भेटघाट बाक्लो बनाउनुभएको छ भने युवा नेताहरुसँग छलफल गर्नुभएको छ । काँग्रेस महाधिवेशन भदौ १६ देखि १९ गतेसम्म काठमाडौंमा हुने गरी कार्यतालिका अनुमोदन गरेको छ । अहिले क्रियाशील सदस्यता छुट्याउने काम भइरहेको छ ।