काठमाडौं, १० चैत्र । प्रधानमन्त्री सुशीला कार्की पदबाट बाहिरिने अन्तिम तयारीमा छिन् । शुक्रबार प्रस्तावित प्रधानमन्त्री बालेन शाहले पदभार ग्रहण गर्ने र सोही दिन शपथ लिने तयारी छ । पद छाड्न केही दिन मात्र बाँकी रहँदा कार्कीले नियमित रुपमा प्रधानमन्त्री तथा मन्त्रिपरिषद् कार्यालय जान छाडेकी छन् ।

कार्यालय स्रोतका अनुसार उनले अब नआउने भन्दै अनौपचारिक रूपमा बिदा लिएकी छिन् । कार्यालयका एक उपसचिवका अनुसार कर्मचारीहरूले औपचारिक बिदाइको प्रस्ताव गरे पनि कार्कीले त्यसलाई अस्वीकार गर्दै साधारण रूपमा बाहिरिन चाहेको बताएकी थिइन् ।

त्यसपछि उनी सिंहदरबारस्थित कार्यालय गएकी छैनन् । उनका व्यक्तिगत सामान पनि सचिवालयका कर्मचारीहरूले उठाइसकेका छन् ।

यता, बालुवाटारस्थित सरकारी निवासबाट उनको परिवारले सबैजसो सामान टोखास्थित निजी घरमा सारिसकेको छ । त्यहाँ सुरक्षाकर्मी राख्न आवश्यक संरचना तयार गर्ने काम केही दिनदेखि भइरहेको थियो ।

पूर्वप्रधानन्यायाधीशसमेत रहेकी कार्की अब पूर्वप्रधानमन्त्रीको हैसियतमा रहने भएकाले उनको निवासमा सुरक्षा व्यवस्था थप कडा पारिनेछ । सचिवालय स्रोतका अनुसार नयाँ प्रधानमन्त्रीको शपथपछि कार्की सिधै टोखास्थित निजी निवासतर्फ जाने तयारीमा छिन् ।