काठमाडौँ, ७ असार । इटालीसँग आइतबार १–० ले पराजित भए पनि वेल्स युरोपियन च्याम्पियनसिपको नकआउट चरणमा प्रवेश गरेको छ । आठ खेलाडी परिवर्तन गरेको इटालीविरुद्ध झिनो अन्तरको पराजय नतिजा निकाल्न सक्नु नै वेल्सको अन्तिम १६ मा पुग्नुको कारण बन्यो ।

अजरबैजानको बाकुमा भएको समूह ‘ए’ को अर्को खेलमा स्विट्जरल्यान्डले टर्कीलाई ३–१ ले पराजित गर्यो । वेल्स र स्विट्जरल्यान्डको समान ४ अंक भए पनि राम्रो गोल अन्तरका कारण वेल्स अर्को चरणमा प्रवेश गरेको हो । यी दुई बीचको खेल १–१ को बराबरीमा टुंगिएको थियो । तर इटालीसँग स्विट्जरल्यान्ड ३–० ले पराजित भएको थियो ।

सहभागी २४ टोलीलाई ६ समूहमा विभाजन गरिएको छ, त्यसबाट प्रत्येक समूहको शीर्ष दुई टोली सोझै अन्तिम १६ मा पुग्ने छन् भने उत्कृष्ट चार तेस्रो हुने टोली पनि नकआउट चरणमा पुग्ने छन् । स्विट्जरल्यान्डको उत्कृष्ट चार तेस्रो टोली हुने सम्भावना बलियो छ । समूह विजेता बनेको इटालीले समूह ‘सी’ को उपविजेतासँग शनिबार वेम्बलीमा क्वार्टरफाइनलमा प्रवेश पाउन खेल्ने छ । वेल्सले सोही दिन समूह ‘बी’ को उपविजेतासँग नकआउट चरणको खेल एमस्ट्राडाममा खेल्ने छ ।

इटालीले वेल्ससँगको नतिजासँगै लगातार ३० खेलको अपराजित कीर्तिमान बनाएको हो । इटालीको यो लगातार ११ औं जित हो । इटालीले यस प्रतियोगितामा कुनै गोल नखर्ची ७ गोल गर्न सफल भयो । रोममा खेलको एकमात्र गोल म्याटिओ पेसिनाले ३९ औं मिनेटमा मार्को भेर्राटीको फ्रिकिक पासमा गरेका थिए । वेल्सले अन्तिम आधा घन्टाभन्दा बढीको सयम १० खेलाडीमा खेलेको थियो । फेड्रिको बर्नान्डस्चीलाई कुल्चिएपछि इथान एमपाडुले ५५ औं मिनेटमा सिधा रेडकार्ड पाएका थिए ।

बाकुमा लिभरपुलका विङगर जेर्डन साकिरीले दुई गोल गर्दै स्विट्जरल्यान्डलाई विजयी बनाए । ह्यारिस सेफेरोभिजले गोल गरी स्विसलाई छैटौं मिनेटमै अग्रता दिलाए । साकिरीले २६ औं मिनेटमा पेनाल्टी बक्स बाहिरबाट उत्कृष्ट गोल गरी स्विसको अग्रतालाई दोब्बर बनाए । दुबै गोलका लागि स्टेफन जुबेरले पास दिएका थिए ।

इरफान च्यान काहभेसीले ६२ औं मिनेटमा टर्कीबाट अर्को सुन्दर गोल गरे । टर्कीको प्रतियोगितामा यो पहिलो गोल थियो । त्यसको छ मिनेटपछि नै साकिरीले गोल गरी स्विट्जरल्यान्डको विजय निश्चित गरे ।