काठमाडौं, २१ जेठ । प्रधानमन्त्री केपी शर्मा ओलीले भारतसँग भएका असमझदारी हटेको बताउनुभयो । बीबीसी हिन्दी सेवाका लागि पत्रकार शालु यादवलाई दिएको अन्तर्वार्तामा उहाँले छिमेकी देशहरुबीच प्रेमसँगै समस्या पनि हुनु स्वाभाविक भएको बताउनुभएको हो ।

‘असमझदारीहरु थिए, तर अब ती असझदारी हटेका छन्। कुनै समय असमझदारी थियो भन्दैमा त्यसैमा अल्झिएर बस्नु हुँदैन। भविष्य हेरेर अगाडि बढ्नुपर्छ। केही अँध्यारा र काला पक्षहरु थिए भने पनि त्यसमा अल्झिनु हुँदैन, उज्यालो पक्षलाई लिएर अगाडि बढ्नुपर्छ,’ उहाँले भन्नुभयो ।अन्तर्वार्तामा प्रधानमन्त्री ओलीले नेपाल र भारतबीच सिमाना खुला भएको भन्दै कोरोना महामारी एक अर्को देशमा फैलिनु स्वाभाविक भएको बताउनुभयो ।

नेपाल र भारतको मित्रतालाई हेरेर भारतले पूर्ण रुपमा सहयोग गर्नुपर्ने उहाँले बताउनुभयो । ‘नेपाललाई अरु देशभन्दा फरक ढंगले हेर्नुपर्छ भारतले, किनकि हामी त्यस्तो छिमेकी हौँ जहाँ खुला सिमानामा दुवैतिर खेत छन्। कहीँकहीँ त दशगजा कहाँ छ, त्यो पनि थाहा छैन। मानिसहरुबीच हरेक कुराका निम्ति आवतजावत हुन्छ। यी र हाम्रो मित्रतापूर्ण सम्बन्धलाई ध्यानमा राखेर भारतले पूर्ण सहयोग गर्नुपर्छ।भारतले सबैभन्दा पहिले नेपाललाई कोभिडको खोप उपलब्ध गराएकोमा प्रधानमन्त्री ओलीले भारतलाई धन्यवाद समेत दिनुभयो ।