काठमाडौं, ९ चैत्र । नयाँ सांसदको शपथ, प्रतिनिधिसभा पहिलो बैठक र मन्त्रिपरिषद् गठनको तयारी भइरहँदा निर्वाचन गराउने प्रमुख जिम्मेवारीसहित गठन भएको प्रधानमन्त्री सुशीला कार्की नेतृत्वको अन्तरिम सरकारको औचित्य सकिएको छ। बाँकी रहेका मन्त्रीहरू पनि धमाधम बाहिरिरहेका छन्।

प्रधानमन्त्री कार्की आफैँ पनि बिदाइ भेटमा व्यस्त देखिँदा सरकारको औचित्य सकिएको हो।महिला बालबालिका तथा ज्येष्ठ नागरिकमन्त्री श्रद्धा श्रेष्ठ आफ्नो कार्यकालका १०० दिनको उपलब्धि सार्वजनिक गर्दै सोमबार बिदा भएकी छिन् । अर्थमन्त्री रामेश्वर खनाल पनि मन्त्रालय जान छाडेका छन्। भूमि व्यवस्था, सहकारी तथा गरिबी निवारण, शहरी विकासमन्त्री कुमार इङ्नाम पनि सरकारबाट बाहिरिसकेका छन्।

यसअघि चुनावअघि नै चार मन्त्री बाहिरिएका थिए। मन्त्री पदबाट राजीनामा दिएर उम्मेदवार बनेका चार मध्ये ३ जना विजयी भइसकेका छन् । तत्कालीन ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकासमन्त्री कुलमान घिसिङले चुनाव हार्दा युवा तथा खेलकुदमन्त्री बब्लु गुप्ता, सञ्चार तथा सूचना प्रविधिमन्त्री जगदीश खरेल र शिक्षा विज्ञान तथा प्रविधिमन्त्री महावीर पुन सांसद बनेका छन्। मन्त्री बन्ने र राजिनामा दिने सिलसिला चलिरहँदा प्रधानमन्त्री कार्कीले छोटो अवधिमा १० पटक सरकार पुर्नगठन गर्नुपरेको थियो। प्रतिनिधिसभामा करिब दुई तिहाइ सिट जितेर सरकार बनाउने बाटोमा लागेको राष्ट्रिय स्वतन्त्र पार्टीले सरकार गठनमा ढिलो गर्दा सिंहदरबारमा मन्त्रालयका कुर्सी रित्ता छन्। मन्त्रालय मन्त्रीविहीन हुँदा दैनिक कामकारबाही प्रभावित हुन थालेको गुनासो आउन थालेको छ।

संघीय संसद् सचिवालयले यही चैत १२ गते नवनिर्वाचित सांसदहरूलाई पद तथा गोपनीयताको शपथ गराउने तयारी गरेको छ। राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह ‘बालेन’ले चैत १३ गते प्रधानमन्त्रीको शपथ लिने भएपछि राष्ट्रपति कार्यालयले तयारी थालेको छ । प्रतिनिधिसभा निर्वाचनमा झण्डे दुई–तिहाइ सिट जितेको रास्वपाले बालेन शाहलाई प्रधानमन्त्री बनाउन लागेको हो। रास्वपाले चैत १३ मा नयाँ प्रधानमन्त्रीको शपथका लागि राष्ट्रपति कार्यालयलाई पत्र पठाइसकेको छ । त्यही अनुसार राष्ट्रपति कार्यालयले पनि तयारी थालेको छ। राष्ट्रपति रामचन्द्र पौडेलले गृहमन्त्री ओमप्रकाश अर्याललाई राष्ट्रिय सभा सदस्यका लागि गरिएको सिफारिस ‘होल्ड’ अवस्थामा राखेका छन्। चैत १ को मन्त्रिपरिषद बैठकले सरकारको सिफारिसमा राष्ट्रपतिले नियुक्त गर्ने राष्ट्रिय सभा सदस्यको रिक्त एक पदमा अर्यालको नाम सिफारिस गरेको थियो। बालेनको शपथ अगाडि नै राष्ट्रिय सभा सदस्यमा अर्यालको नियुक्ति गर्ने तयारी भएको राष्ट्रपतिको कार्यालयले जनाएको छ।